素食者新手村攻略

「我都想轉食素啊，但食素真係好難……」

古語有云：「愛就係選擇。」我相信睇得呢篇文嘅你應該或多或少對食素有啲興趣，但又未係好下到決心實行，作為食咗一年魚素嘅超級新手，呢篇文想試下分享一啲心路歷程俾心郁郁想試下食素嘅大家。

呢篇文主要都係想講下食方便素、蛋奶素呢啲入門級素食，食純素固然係最好啦，但食素就好似抗爭噉，要一步一步噉進化咖嘛～

（撩交嗌嘅請轉戰呢度）

食素係自己嘅選擇

唔好覺得自己冇得食肉好慘，要明白你唔係被逼，你係自願作出選擇嘅。我絕對經歷過去大X樂發現咖喱雞飯賣43蚊、咖喱雜菜飯𧶠41蚊，覺得自己明明俾多兩蚊就有肉食，偏偏要食菜覺得好唔抵，好似全世界都逼自己要食肉嗰種感覺。會有呢種感覺應該係擺脫唔到「肉先係主角」嘅肉食者心態，但其實點解菜就唔可以做主角呢？食素pizza、素春卷、雜菜意粉一樣可以好滿足好開心。唔好覺得食素係為咗拎光環而做嘅苦行修練，由衷地鍾意食素先可以扺得住其他人嘅challenge，先可以維持得長久。

圖片來源：和平飲食之旅 Facebook

由Green Monday做起

對我自己嚟講，由食肉轉做食魚素，其實我冇乜經歷過立定好大嘅決心或者發誓以後唔再食肉呢啲里程碑。雖然話冇，但其實望返轉頭，其實都係一步一步發展出嚟 —— 我讀大學嗰陣學校本部開咗間素can，呢間canteen一開始吸引到我嘅原因絕對唔係佢賣素食，而係佢無論喺咩時段入去都唔駛排隊搵位。我一開始入去食時都係抱住唔想排隊唔想逼，好又一餐唔好又一餐，食完拿拿臨去上堂嘅消極心態入去食飯，點知一食就鍾意咗呢間canteen，就成日努力拉攏各方友好陪我食素can，自自然然就會覺得食素都可以食得好精緻，甚至比食肉更加精緻，當你開始習慣咗生活入面冇肉食都可以好快樂好滿足，唔再食肉對你嚟講就稱唔上「捨棄」。

雖然坊間有好多好好食嘅素食餐廳，但我最愛嘅始終係大學素can，除咗係我嘅素食啟蒙，入面啲姐姐真係好nice好錫我。

發掘普通餐廳入面嘅素食

好多人知道我食素，第一時間就會覺得同我食飯一定好麻煩，其實會有呢個諗法嘅人好多時只係冇為意好多餐廳都有素食嘅菜式。我第一日返工，循例就唔帶飯同同事出街食啦，我同佢哋講我食素時佢哋都有少少面有難色，我就講咗句：「冇問題啊，你哋求其揀一間就得㗎喇。」佢哋半信半疑，最後揀咗間韓國餐廳，我隨便就揀到個素食嘅餐食，而另外有個唔係食素嘅同事揀嗰個餐都係冇肉嘅成份喺入面嘅。嗰啲同事見到就覺得好驚訝：「我真係唔知呢間餐廳有素食喎！」梗係啦，你對眼淨係focus落啲肉度嘛。