自私偽善的大愛左膠

到底係邊個自私偽善？

由細到大同屋企人去街市買餸，最驚企喺啲雞檔同魚檔隔離 —— 啲魚被劏前嘅垂死扎掙、失雞無神聽到啲雞倚天長嘯，到最後一切回歸平靜，幾片羽毛緩緩飄落，我總係會覺得唔太舒服。

之但係我冇因為噉而自此唔食肉，後來高中讀中文，孟子話呢啲叫「君子遠庖廚」。嗯，幾好 —— 啊有啲肚餓，陣間去啪返盒脆香雞翼先。

就噉持續咗廿一年，我都係keep住君子遠庖廚嘅態度，一邊覺得啲畜牧動物好可愛好可憐，一邊毫無感恩地享用佢哋嘅身體。不過近年香港開始多咗素食餐廳，我身邊又越嚟越多食素嘅朋友，再加上食素感覺上比較健康同環保，種種原因加持，漸漸我覺得其實食唔食肉對我嚟講都冇咩太大分別，「唔食肉」帶俾我嘅滿足感（或者優越感啊、自我感覺良好啊、道德光環whatever）似乎已經足以填補我冇肉食嘅空虛感，於是我而家係一個唔太嚴格嘅素食者。

有時見到好多人對素食者有好多judgement，今日有啲嘢想同咁多位法官講下。

唔好預設素食者唔食肉嘅原因

見啲人鬧素食者偽善，論點來來去去都不外乎「食素肉齋口唔齋心」、「食菜都係殺生喎」，然後講唔埋兩句就人身攻擊。其實每個人食素都有佢自己嘅原因，有人係因為宗教原因、有人因為動物權益、有人想減輕下碳排放，甚至有人係因為健康問題而唔食得肉。假如今日我係為咗動物權益而茹素，同時每日縱慾釋放真我，然後被人扣一句「齋口唔齋心有鬼用咩」落嚟，真係得啖笑 —— 我從來都冇諗過要清心寡慾喎。

另外想講下，「維護動物權益」驟耳聽落好似等同於「唔殺生」，但事實上「維護動物權益」同「唔殺生」追求嘅嘢唔太一樣。所謂維護動物權益，係因為現代社會嘅factory farming對動物造成咗好多不必要嘅傷害 —— 完全無法舒展身體嘅生存空間、為追求速度而強行餵食導致雞隻骨折，我相信比起喺屠宰場最後嘅垂死掙扎，農場先係真正嘅慘不忍睹，有素食者係因為覺得飼養動物嘅方式太唔人道而選擇食素，其實並唔代表佢追求嘅係唔殺生。

奉勸各位喺鬧素食者偽善之前，先了解下人哋因乜解究食素先，亂扣帽子落素食者身上，並唔會為閣下帶來任何好處，只會展露出自己嘅魯莽同無知。

多餘嘅素食者

上一場我有份參與嘅素食筆戰，有人覺得素食者多餘，覺得呢個世界就係弱肉強食，喺度quote返友人Johnas嘅回應：

呢個世界係殘忍㗎，噉人哋都係想令到佢冇咁殘忍、美好返少少啫。你一句話「係殘忍㗎啦」，噉好多嘢都唔使做㗎喎。做咩要爭取民主啫？有強權無公理呀

之後該網友問：「食素唔殘忍？」

Johnas問「點樣殘忍？」之後該網友俾咗個haha reaction一笑置之，唔知佢係覺得應都費事，定係以笑遮醜。我諗佢可能係返返去上面覺得「食素都係殺生」嘅問題，有一部份上面答咗，喺呢度想俾另一個角度：

「做唔到完全唔殘忍，所以故意去殘忍」係一件好荒謬嘅事，你唔會因為考試一定考唔到一百分，所以故意去考得差，或者任由自己考得差。就好似你唔會因為自己食肉好殘忍所以食埋人（我估）。所以，退一百步嚟講，我就當食素真係殘忍，但至少素食者有努力去減低佢哋造成嘅傷害…