Member-only story
《返中學探老師，結果見得最多嘅係個新嚟嘅阿Sir》(8)
「睇緊咩笑得咁開心啊？」
見呢章好似有啲短，求其加啲廢話充塞下字數先（笑）：連載嚟到第八日，好高興同大家宣佈我已經將成個故仔寫好咗（係我人生第一個冇爛尾（好似係）嘅故仔啊！），total會有12集正文+一集番外，嚟緊我會繼續用每日一篇嘅形式連載埋淨低嘅集數，即係今個weekend就會完晒成個故事喇。
*
今日十點半落堂，我同Becky諗住喺學校canteen食個brunch先，食完就去圖書館溫書寫paper。
我負責霸住個位，Becky就幫我買埋嘢食。
我碌住ig等Becky，碌碌下右上角有個紅色點點，我就即刻撳咗入去。
阿樂send咗張相俾我，係一樖用書疊埋砌成嘅聖誕樹，上面仲繑住啲燈飾，閃下閃下噉。
事緣我之前碌ig見到啲外國人用啲書砌咗樖聖誕樹出嚟，覺得都幾靚，就send咗個post俾佢睇。
佢嗰陣話要研究下先，結果隔幾日佢就整咗出嚟。
「效果幾好吖，你砌咗幾耐啊？」
「一開始砌咗半個鐘，但係砌極都冧，後尾上網搵咗啲教學，再砌咗個半鐘至成功」
「叻 👍🏻」
畫面顯示佢打緊message，我等咗一陣佢都未send出嚟。呢個時候Becky拎住個托盤行咗過嚟。
「睇緊咩笑得咁開心啊？」Becky攞低個托盤喺我面前：「呢份你嘅。」
「冇啊，求其碌下ig咋嘛。」我故作自然噉熄咗個mon，作咗個答案搪塞過去。
Becky冇諗太多，笑咗笑就出去拎埋另一份早餐。
其實我唔係有心想隱瞞，只係成件事太戲劇化，Becky又同中學啲師弟妹咁熟，我唔想造成咩誤會，驚傳返學校會影響到阿樂。
食食下早餐，Becky突然問我：「喂你幾多號完sem啊？」
我開咗電話個schedule出嚟睇：「最後一個考試係12號，最後一份paper就20號deadline，交埋就完sem喇。」
「噉你23號去唔去中學Christmas Party？好多同學都會返去。」
其實我有啲抗拒呢啲舊同學gathering，大家每次見到面，都係交流下近況，然後講下邊個同邊個拍咗拖，邊個同邊個分咗手，好無聊。
俾着平時嘅我，應該會一口回絕，但係今年我竟然有少少想去。
「我⋯⋯諗下先，遲啲答你。」
「哦，你去就同我講啦。」
我食得比較快，等緊Becky食嘢嘅時候，我拎咗部電話出嚟，想睇返阿樂頭先打緊嗰個message講乜。
「係呢，學校23號開Christmas Party，到時會唔會見到你啊？」
*
