《返中學探老師，結果見得最多嘅係個新嚟嘅阿Sir》(9)

「你真係教畜嚟㗎喎。」

第一集 ｜ 上一集

*

最後我都係同Becky講咗我會去Christmas Party。

「真係㗎？好啊！到時我哋十點半喺學校門口等啦 🥳」

我當然都有同阿樂講我會去，佢覆我「好啊，到時見」。

之後佢又補咗條message過嚟。

「我11點會join師生籃球賽，賞面嘅話歡迎你嚟觀賽」

「冇問題吖，加油 💪🏼」

使唔使準備啲咩呢？我諗咗幾日，最後決定整啲曲奇送俾佢。

真係搞笑，讀書嗰陣啲女同學好興喺聖誕節、情人節整曲奇、朱古力返學校派。中學時期嘅我一次都冇派過，估唔到畢咗業先嚟搞啲噉嘅嘢。

我提早喺18號趕起最後一份paper，之後嗰幾日，我都喺度試唔同嘅食譜同練習擠朱古力醬，希望整出嚟嘅成品唔會太肉酸。

好彩最後啲曲奇餅睇落都正正常常，唔會好似中咗輻射噉。

我將啲曲奇入落啲袋仔度，用鐵線封好口，再將所有包好嘅曲奇擺曬落一個紙袋入面。

大功告成！

嗰晚我喺張床上面典嚟典去，搞到差唔多成三點先瞓得着。

但係我第二朝未到九點就醒咗。

我緩緩起身梳洗。梳洗完返到房，隨即拎起衣櫃入面襯好咗套衫出嚟換。

我前一晚失眠嗰陣已經諗好咗今日要着咩——上身米色針織上衣，下身係啡色格仔裙。

仲有少少時間，我又捲咗個頭髮、畫咗眉，同埋搽咗少少唇膏，等個樣望落精神啲。

我諗住趁Becky唔喺度送咗啲曲奇俾阿樂先，所以我比約定時間早咗半個鐘返到學校。

我抱住個紙袋喺學校四圍搵阿樂嘅身影，但都係搵唔到。

唔通佢喺圖書館？

我行到圖書館門口，對住電話前鏡撥好啲頭髮，深呼吸咗幾次，然後推門入去。

我一推開門，就見到阿樂企正喺我面前。

「叫咗你嚟之前講聲𠺢嘛，成日無啦啦殺上嚟。」佢用開玩笑嘅語氣指責我突然來訪。