Member-only story
《返中學探老師，結果見得最多嘅係個新嚟嘅阿Sir》(2)
「係我嚟。」
*
我嚇到彈起，擰轉頭一望，係個高高瘦瘦嘅男人，睇落好後生，應該最多大我幾年，白色恤衫出面笠咗件寶藍色長袖冷衫，戴住副黑色幼框眼鏡，俾人感覺好斯文，好似大學嗰啲文青男同學噉。
我將本書冚返埋，望下「張Sir精選」隔籬個卡通人仔，又再抬頭望下個年輕男人，好似有啲似樣⋯⋯
「係我嚟。」男人笑咗笑，好似知我個腦諗緊咩：「我係張Sir，今年新入職，接替黃太幫手打理圖書館，同埋教低年班歷史科。」
「⋯⋯你好。」我冇諗過匿到入圖書館都要同人傾偈，仲要係個我從來冇見過嘅新阿Sir。
「我叫Joanne，係18年畢業嘅校友 — — 係呢，乜黃太退咗休？佢個樣又唔似咁快要退休喎。」其實我唔係真係咁想知黃太去咗邊，不過我唔知講咩好，唯有求其搵啲嘢嚟講。
「我都唔係太清楚，不過聽啲同事講佢係同屋企人移民所以唔做。」
「⋯⋯哦。」死啦，我係咪開錯話題？我而家應該講咩好啊？
可能我反應太冷淡，張Sir個樣有啲尷尬，佢試探性噉問我：「你⋯⋯你係嚟搵黃太嘅？佢唔喺度，你咪白行一趟？真係唔好意思啊。」
「吓？唔係啊。」佢係咪以為我同黃太好熟，不滿佢取代咗黃太嘅地位？今次到我笑咗出嚟：「我同朋友約咗Miss Lee十二點半食晏，見未夠鐘上嚟打發下時間啫。」
我睄一睄張Sir，佢個人即刻冇咁崩緊，有種如釋重負嘅感覺：「哦，原來噉咋，好彩啫。」
唔知點解而家啲新老師好似好大壓力噉。明明黃太喺度做嗰陣，每年嘅圖書館活動都係借書龍虎榜同十大好書選舉，閱讀計劃啲書單六年嚟都冇更新過，仲要本本都係嗰啲五六十年前嘅散文小說。好似張Sir精選呢啲書，我喺中學生涯從來都冇見過。
雖然唔知佢需唔需要，但我決定鼓勵下佢：「呢啲書全部都係你推薦學校買㗎？啲書名睇落好吸引噉，如果我讀書嗰陣圖書館有呢啲書，我應該會好有興趣嚟打書釘。」
「你指『張Sir精選』？一啲啲啦，其實啲書大部分都係我買嚟俾自己睇，睇完覺得啱班學生睇嘅書就捐出嚟俾學校，噉我屋企就有位可以擺其他書。」
講到呢度，佢拎起一本《如果歷史是一群喵》：「呢套書就用學校budget買嘅，我寫proposal時不斷強調啲書可以幫學生學歷史，對佢哋課業有好大幫助，副校長先肯批。其他你見到嗰啲社會科學、哲學普及嘅書，好多都係我用自己錢買嘅。始終圖書館大部份budget都要用嚟買pastpaper同練習卷俾高中學生，實在冇咁多資金買呢啲所謂閒書。」
貼錢返工？呢條友係咪黐線㗎？
*
