Member-only story
《返中學探老師，結果見得最多嘅係個新嚟嘅阿Sir》(1)
「如果啲學生都有你咁認真對待我啲書就好喇。」
話說近期喺連登追故成日覺得都唔夠喉，為咗滿足我嘅少女心，我決定自己寫埋一份。
唔會寫得好長，估計十章左右會完。今日得一堂八半堂，Becky約咗我返中學同老師食晏。
我同Becky係讀大學先開始熟嘅。雖然我哋中學已經同班，不過Becky由Form 1開始已經好熟衷參與校園活動，去到高中又做社長又做prefect，加上佢標緻嘅五官同開朗嘅性格，令Becky喺學校入面風頭一時無兩。而我份人比較慢熱，同呢啲風雲人物自然冇乜交集。
不過Becky上到大學之後就摺咗好多，據佢本人嘅講法，係因為佢覺得大學啲soc好多都係為交誼而存在，而唔係真心想鑽研嗰樣興趣，令Becky有少少卻步。
Becky真係個好厚道嘅人，我O Camp嗰陣親眼見住啲組爸omate對住Becky獻晒殷勤噉，又拎袋又扭樽蓋，唔知仲以為Becky係傷殘人士。
大佬，Becky係學校運動會鐵餅同標槍紀錄保持者嚟。
講遠咗。
雖然Becky好好，不過此時此刻佢抌低咗我一個，我覺得自己好似隻鬼噉，充滿怨念地喺中學走廊度飄下飄下。
事緣我哋早咗到但又未夠鐘食飯，於是我哋決定返去同其他老師吹下水、打發下時間。
結果就係同Becky傾偈嘅老師一個接一個，但當中好多都係Becky玩課外活動嘅帶隊老師嚟，同我完全唔熟。我一開始都仲有喺隔籬聽下笑下，俾下反應，但唔知點解我聽聽下就飄走咗，得返自己一個人四圍遊蕩。
我望望電話，11點15分，距離約好嘅食飯時間仲有成個幾鐘，噉樣周圍行都唔係辦法，不如索性入圖書館打下書釘消磨時間好過。
入到大學之後就覺得中學圖書館真係好細，不過中學生都係旨在有個靜靜哋嘅地方俾自己溫下書用下電腦，需求簡單好多。
圖書館入面有幾個學生搏晒命噉喺草稿紙上面奮筆疾書，枱面散滿文具，仲擺咗個計時器喺隔籬倒數，睇嚟係中六師弟妹最後衝刺緊。
我唔想騷擾到佢哋，於是我轉身行到一個寫住「老師推介」嘅書架前面。
老師推介⋯⋯係新推出嘅閱讀活動？我明明記得中學個圖書館老師淨係識得將我哋中英文堂交嗰啲讀書報告印晒出嚟，貼滿成個壁報版就算。乜個老師而家轉死性，變咗逼同事交數？
我隨手拎起一本叫《圖解社會學》嘅書，書上面貼住一張印住「張Sir精選」嘅紙仔，字嘅隔籬仲有一個卡通人仔，係一個戴住眼鏡、着住藍色恤衫嘅男士，手上拎住粒黃色星星。
張Sir？我明明記得圖書館老師係個中女嚟。
再望望書架上面其他書，有大半都貼咗「張Sir精選」，啲書睇落都幾特別，例如有咩《自願被吃的豬》、《文青這種生物，自古就有》、《如果歷史是一群喵》⋯⋯不過都有其他老師嘅推介，例如《古文觀止》、《煙花三月》、《唐山大地震》，仲有《香港中學文憑考試資訊及通訊科技2017試題專輯》。
「乜鬼嘢⋯⋯」我衝口而出。
隱隱約約感受到遠處有啲目光嘅注視，我意識到自己嘅失禮，即刻擺返低本試題專輯，然後將本《圖解社會學》拎返埋位睇。
「如果啲學生都有你咁認真對待我啲書就好喇。」突然有把男人聲喺我背後響起。
*
