Member-only story
《返中學探老師，結果見得最多嘅係個新嚟嘅阿Sir》(10)
「你冇發燒吖嘛？」
*
為防佢又追上嚟講埋晒啲迷惑人心嘅花言巧語，我索性早少少行出校門等Becky。
未等到Becky，我反而見到另一個熟悉嘅身影：
「Joanne？你竟然會嚟呢啲風月之地？仲要打扮得咁靚，Oh my god，世界變喇。」
齋聽把煩膠聲都知條友係乜水。
你可能會以為講嘢嘅係個出名乞人憎嘅八婆之類嘅人物，所幸並唔係，佢係我同Becky嘅好姊妺Darren。
Darren同Becky可以話係郎才女貌，讀書嗰陣佢哋分別係社長同副社長，Darren身型高大，氣宇軒昂，成績又名列前矛，唔出聲嘅時候都真係稱得上係一名男神。
當年佢同Becky成日都出雙入對，令到好多男同學都視Darren為情敵。
曾幾何時我都誤信傳聞，以為佢哋真係拍緊拖。
直到我讀大學同Becky熟咗先知，Darren係gay嘅。
我哋三個讀同一間大學，Darren同我哋唔同系，不過我哋間中都會一齊食lunch同出去唱K。
Darren可以話係我現階段最信得過嘅男性朋友。
雖然佢把口真係好賤格。
「收皮啦你。」我反Darren一個白眼。
「你手上拎住呢袋咩嚟㗎？」Darren不停上下打量我，好快就發現咗我個紙袋。
「冇，我最近無聊整咗啲曲奇，諗住拎返嚟請大家食啫。」我拎咗一袋曲奇出嚟遞俾Darren：「你要唔要啊？」
Darren作勢伸手摸向我額頭：「你冇發燒吖嘛？」
我笑住撥開Darren：「妖，噉你要唔要啫？咁多口水！」
「要，梗係要啦。難得見你整嘢食，我冒住入急症室洗胃嘅風險都要試下咩料。」Darren喺我手上搶過曲奇。
呢個時候，Becky都到咗學校門口。
「Joanne！Darren！你兩個都喺度，實在太好喇！我哋快啲入去啦！」
結果我哋同Becky淨係傾咗十分鐘偈，之後佢就俾佢個社啲師弟妹拉咗去幫手看小吃攤檔，得返我同Darren兩個相依為命。
「你當年好似都係副社長嚟㗎喎，點解你唔使幫手嘅？」我問Darren。
「Becky一個打十個啦！使乜我出手？」說罷，Darren探頭望向籃球場。
「嗰邊有籃球比賽睇啊，我哋去𥄫仔好過啦。」
見我企喺原地發呆，Darren索性拉住我隻手向前行。
*
