Member-only story
What doesn’t kill you makes you stronger：陳奕迅〈重口味〉、陳健安〈煉獄健身室〉歌詞解讀
捱過失戀嘅日子。
先講結論：呢兩首歌背後都係傳達緊同一個訊息：
What doesn’t kill you makes you stronger.
然後〈重口味〉副歌第一句嘅「每次殺不死你殺不死你也醫好你」其實exactly就係直譯上面句英文idiom（我簡單Google過其他〈重口味〉嘅分析，但似乎都搵唔到呢個講法，不過我有自信呢個解讀係準確嘅）。
然後我哋一如即往，用冗長嘅閒話家常嚟引入正文：
第一次聽呢兩首歌已經係好耐之前嘅事——〈重口味〉喺2012年派台、〈煉獄健身室〉喺2017年派台，當年我仲讀緊初中同大學，未有咩太深刻嘅戀愛經驗，亦都冇細味過歌詞嘅含意，對佢哋冇乜感覺。
上年我建立咗健身嘅習慣，對肌肉鍛煉有咗少少粗淺嘅認識，有日突然諗返起On仔首〈煉獄健身室〉，認真睇一次歌詞先發現：大癲！啲歌詞驚為天人！到底點解可以咁巧妙地將鍛煉肌肉同失戀move on兩件看似風馬牛不相及嘅嘢扣埋一齊！！！
當時嘅我太mind blown，喺ig出咗兩個stories，簡單分析〈煉獄健身室〉嘅歌詞有幾神乎其技。我本身諗住好好寫底咗自己嘅思緒，成件事就告一段落了。結果前幾日我突然諗起“What doesn’t kill you makes you stronger”呢句我好鍾意嘅idiom，開咗好耐冇聽過嘅〈重口味〉嚟聽，一邊聽一邊諗「嘩個中心思想會唔會太似〈煉獄健身室〉，唔得要認真喺Medium寫返篇對讀」——冇錯呢篇文就係噉嚟。
如果你有睇過我當時嗰兩個stories嘅，可能會覺得呢篇文睇落熟口熟面，不過今次我會加埋同〈重口味〉嘅對讀，令篇文嘅內容再豐富啲。
然後我都係開咗呢篇文之後先發現兩首歌都係由Wyman填詞（然後兩個演唱者都係姓陳） ，即刻有種兩首歌係一脈相承嘅感覺。
雖然我個聽歌心路歷程係調返轉嘅，但顧及到派台年份，我會先講〈重口味〉，再講〈煉獄健身室〉，噉我哋開始了！
