死唔斷氣之創作手記

《返中學探老師，結果見得最多嘅係個新嚟嘅阿Sir》連載後感

大家好，又係我（同我嗰個標題長到飛起嘅故仔），真係最後一篇喇。

呢篇文係想講下我喺創作人生第一篇（狹義）小說時嘅一啲體會同反思，如無意外應該唔會有劇透，不過你有興趣嘅話都可以撳呢度睇下個故仔係講乜。

（係第一篇小說先會咁剎有介事LOL，之後有機會再寫嘅話都應該冇咁多嘢講㗎喇……）

文學嘅雅俗

少不更事嘅時候，成日覺得雅文學同俗文學嘅界線係壁壘分明嘅，俗文學嘅地位喺雅文學之下，兩者之間隔咗條楚河漢界，互不相干。

大個少少發現，條所謂界線實在模糊得可怕。今時今日你睇張愛玲會俾人標榜做「文青」，但係幾十年前，張愛玲嘅愛情小說係大眾化嘅流行文學嚟。係直到張愛玲嘅作品獲得文學家夏志清嘅高度讚賞，張愛玲喺文學史嘅地位先至穩固起嚟。

再諗多步，喺反映歷史同社會面貌之外，文學作品另外一個好撚重要嘅面向，正正係同讀者connect，提供娛樂、引起共鳴、聊以慰藉blablabla……

如果讀者冇辦法連結到雅文學，即使寫得再好，對嗰個讀者都係徒然。

帶住上面呢堆文學觀，我就可以無視一切枷鎖噉寫自己想寫嘅題材同體裁了，嘻嘻！

（頭盔：我係一心想寫通俗小說的）

自由嘅業餘寫手

我唔靠寫嘢開飯，所以喺創作時係非常自由嘅。

有一期癮起會睇中國嘅言情小說，佢哋嘅網絡小說行業發展得好蓬勃，但唔知係咪因為啲作者靠寫小說維生，啲故事成日都拖得好長，我成日睇到男女主角一齊之後就會棄故XD

另外就係全職寫手會擔心點擊率、讀者反饋之類嘅嘢，但我就完全冇呢方面嘅煩惱，冇直接收讀者錢嘅好處係想寫咩就可以寫咩，寫得唔好都唔駛驚俾人鬧回水XD

連載過程入面唯一嘅壓力來源，應該係我由day 1開始已經決定咗要每日連載，因為我自己追故嘅時候都會想每日都有故睇。不過好在故事入面嘅角色都好活躍，成日都喺我個腦入面走嚟走去，每日連載都係輕鬆達成嘅。

虛構嘅現實

注意：呢節有少少劇透

喺現實生活中認識我嘅人應該都睇得出，故事入面嘅好多設定都係我喺生活入面抽取出嚟。例如故事入面嘅中學原型係我嘅母校、男主角嘅職業源自我嘅正職工作，至於喺第十集先無啦啦彈出嚟嘅Darren，係我嘅一位gay friend睇完頭幾集之後日日洗我腦要我將佢改成BL故，為咗答謝佢對故事嘅喜愛，我就加咗個gay friend角色落故仔入面，仲交咗角色嘅命名權俾佢。