開箱黑歷史

為賦新詩強說愁。

事緣Instagram無啦啦send咗封噉嘅email俾我：

我對個account一啲印象都冇。

噉我就用平時用開嗰個account去search下啦：

屌，乜撚嘢嚟⋯⋯

然後我又試撞下個password，睇下我log唔login到啦。

頂，又真係俾我login到喎。

睇返年份，個account應該係我中五嗰陣開，成個ig都係用嚟放負，當中包括但不限於同儕關係、少女情懷，同埋面對升學嘅惆悵。

全部都係用官話文（a.k.a. 書面語）寫嘅。

揀咗幾個post嚟睇，發現當年嘅我嘅心事主要都係「佢同我講新年快樂啊！」、「好想入中文系」、「我今日喺街度撞到佢啊！」、「入唔到中文系點算？」、「佢同我講早唞啊！」、「點解我好似永遠都入唔到中文系噉嘅？」

睇到尷尬癌，心諗「做咩啫你」。

事隔幾年，呢啲所謂心事全部都已經灰飛煙滅：我順利喺中文系畢業，同時發現當年心目中嘅流奶與蜜之地都不外如是（我懷疑就係因為我及時跳船所以先冇再叫春）；我冇同「佢」發展，甚至冇表露心跡，但我發現even連我幻想中嘅佢好似都唔及而家嘅枕邊人完美。

當年為之憔悴嘅嘢喺而家係幾咁不值一提，無論係事業定愛情，我都搵到更好嘅歸宿了。

更加重要嘅係，我發現其實好多嘢只要行動就會有所改變，至於嗰啲點都改變唔到嘅嘢，都唔值得我浪費時間去呻。

簡單啲嚟講即係冇嘢好呻。

於是我將個ig入面所有嘢都delete曬，登出埋。

放下過去，浩浩蕩蕩迎來另一新世紀。