Member-only story
追近年嘅本地歌影視壇真係好感動
啊！我認得佢啊，佢咪邊套戲入面嘅邊個囉！
由陳凱詠講起
代表作：《天生二品》、《隔離》
私心推介：《婚內情》、《激安百貨》
會留意到陳凱詠，係因為佢喺2020叱咤頒獎禮opening表演跳唱，嗰場表演就中規中矩啦。真正令我留意佢嘅，係男朋友嘅媽媽睇表演時講咗句「我見到佢就諗起激安百貨。」Oh，激安百貨？咪即係我嘅Mirror本命Edan有份主持嗰個直播購物節目？佢就係Edan嘅拍檔主持？於是我開始喺YouTube摷佢啲歌出嚟聽（佢同林家謙合作首duet版《隔離》真係一絕），得閒又stalk下佢ig睇下有冇Edan嘅蹤影（真係有，好開心）。
今日晏晝，我一邊食譚仔一邊開咗陳凱詠個wiki page出嚟睇，咁啱俾我𥅈到佢有出演《婚內情》——wait，《婚內情》？佢做邊個角色啊？啊？！年青版馬淑媛（廖碧兒飾）？！嗰個好好戲，語氣神情都跟足廖碧兒去演嘅後生演員係陳凱詠？！嗰陣我睇佢同郭爾君演嗰場爭仔嘅對手戲時已經好慨嘆兩個女演員都好好戲，原來我一早已經睇過佢演嘅劇集？見到昔日欣賞嘅新生代演員開始嶄露頭角，真係會覺得好感動。
講下顧定軒
代表作：《男排女將》、《全民造星III》：〈我們〉
私心推介：《手語隨想曲6》：〈沒有人是孤島〉
《隔離》搵咗顧定軒做MV男主角。顧定軒因為參演《男排女將》同《全民造星III》而人氣急升。唔知點解，我望住顧定軒個樣硬係覺得佢有啲熟口面，好似喺邊度見過佢做啲毒撚角色，之後我去YouTube一search，佢果然係我之前睇港台節目《手語隨想曲》其中一集嘅男主角（嗰集嘅女主角係談善言）！
當一個藝人2020年開始竄紅，而自己喺佢紅之前已經睇過佢相對早期少少嘅作品，見到佢一直努力唔放棄，終於為人認識。中間努力嘅過程我當然冇份參與（I mean in all sense都係冇份參與），但係可以喺佢紅咗之後馬後炮地講一句：「我一年前已經睇過佢有份出演嘅作品喇！」都係一件幾值得沾沾嘅事嚟。
