Member-only story
茹素者日常社交瑣碎煩惱
庸人自擾之。
之前出過篇文片啲無知嘅反素者，但其實反素者好多時都只會喺網絡世界出現。喺日常生活你好少會遇到反素者，至少啲人唔會夠膽一聽到你係素食者劈頭就話「吓你食素㗎？啲素食者都戇鳩嘅！」不過噉樣唔代表素食者喺日常社交就冇煩惱，喺現實生活中大部份人對素食者都係陌生而友好嘅，但出於善意嘅寒暄其實有時都會為我哋帶嚟少少煩惱。
你食齋㗎？
我返工係帶飯嘅，有時將個飯盒由蒸爐拎出嚟，同事見到我啲餸，會問「你係咪食齋㗎」；又或者有時同事去完台灣帶咗啲豬肉紙返嚟請我食，我對佢微笑婉拒，佢就會當頭棒喝一句「啊係喎你食齋㗎喎」。
其實我都明，對於肉食者嚟講，食「素」同食「齋」同樣意味住「唔食肉」，大部份人會覺得兩者係相等嘅。對我嚟講，有人記得我「唔食肉」我已經好感動，所以我唔會話好介意佢哋覺得我係「食齋」，都從來唔會強行追求政治正確。但係「食齋」呢個tag有時都會為我帶來一啲煩惱，例如有同事會以為我係佛教徒（笑）—— 同埋，係囉，有時食好啲又會引嚟「齋口唔齋心」嘅控訴囉。
＊簡單嚟講：食齋嘅原因多數係宗教修養，食齋嘅人係唔會食五辛，即係連薑葱蒜辣椒都唔會食；至於食素嘅動機就五花八門得多，有興趣可以參考返拙文自私偽善的大愛左膠。
你食唔食得蛋？
如果有人覺得我係食齋，我通常都係微笑硬食就算。但係以下呢個問題真係每次我聽到都會trigger到，都會認真地解釋一次。雖然問題嘅根本，都係離唔開大家對「齋」同「素」嘅誤解。
好多朋友出於好心，想遷就、配合，或者單純了解我嘅飲食習慣，而問我以下問題：
你食唔食得蛋／芝士／同肉一齊炒嘅菜？
每次聽到呢類問題，我都會噉答：
其實我冇嘢係唔食得，如果我想嘅話我乜嘢都食得，我冇食物敏感，亦都冇任何人逼迫我唔准食肉，我係主動自由地選擇唔食肉嘅。
之後先會再答佢「我食啊」。
可能好似好小事、可能因為噉所以有人會覺得素食者好煩，但如果成件事套落另一個場景，你可能會比較感受到嗰種荒謬：
假設有個吸煙者遞咗支煙俾你，你微笑拒絕同對方表明「我唔食煙」，然後對方同你講「吓你非吸煙者嚟㗎？噉你食唔食得水煙／電子煙／加熱煙／雪茄啊？」
係啊只係好細微嘅一個suffix，但成件事嘅主導權即刻被剝奪咗，明明我哋係自主地作出唔食肉嘅選擇，但喺他者嘅眼中就覺得我哋失去咗食肉嘅自由。
建議閣下想了解素食者嘅飲食習慣時，簡單地問「你食唔食」或者「你會唔會食」，其實已經好足夠。
