Member-only story
細路仔想快啲變成大人，大人就想做返細路哥？
唔係咩informative嘅嘢，深知寫完都唔會食到SEO唔會有好多人睇，但係係一個我想寫好耐好耐好耐嘅topic。
中一嗰年，第一次IS uniform test，我考咗27/50分，我間中學係60%先當合格嘅，換言之呢次測驗係我人生第一次唔合格。我好記得我收到份卷之後喊到收唔到聲，四周圍嘅同學仔都走嚟安慰我。返到屋企，我第一句就同阿媽講我測驗唔合格，然後兩行眼淚就流咗出嚟。估唔到嘅係佢竟然冇鬧我，仲叫我飲汽水。
隔咗十幾年睇返，我而家梗係清楚知道其實唔合格，尤其只係一個初中UT，原來真係冇乜大不了，我唔會因為個測驗拎27分而入唔到大學，甚至嗰個成績對我嗰個學年嘅平均分嚟講都只係微不足道。之但係，我依然好記得當時嘅自己喺遇到呢次挫折時嘅失意，我依然記得我會喊得咁犀利嘅原因。而家用上帝視角睇落覺得微不足道嘅挫敗，對當時嘅我嚟講係如同天塌下嚟般嘅災難。
講緊當時嘅我係個「小學長年名列前茅、唔知咩係唔合格，更加唔知咩叫公開試」嘅十二歲𡃁妹。後來我唔合格當食生菜，再後來我長期文學默書零分（因為唔肯背範文），呢啲都係後來有更多經歷、有更多領悟嘅我吃得消嘅事情。但係喺嗰個moment，嗰次嘅唔合格對嗰時嘅我嚟講係個實實在在嘅打擊，呢個係改變唔到嘅事實。
好多人覺得細路仔無憂無慮，只係因為小朋友眼中嘅憂慮喺已經長大成人嘅佢哋眼中都係不值一提嘅bullshit。師傅啊，你見到小朋友喺公園跑嚟跑去時就用小朋友嘅心態覺得佢哋嗰啲係「單純嘅快樂」，去到做功課默書時就用大人嘅心態視佢哋嘅災難如浮雲，你唔好出香港糧去泰國生活然後大讚泰國人嘅生活質素真係高過香港人唔知幾百倍？下屆諾貝爾經濟學獎得主仲唔係你？
如果話「當下嘅煩惱永遠都係最大嘅煩惱」，噉都只係prove到「做小朋友同做大人一樣咁好／差」，但係我始終享受做大人多啲。或者噉講，我代表唔到未來嘅自己發言，但至少當下嘅我好享受自己而家做「年輕嘅大人」呢個生命階段。我覺得而家係一個相當好嘅階段，而我好希望十年、二十年、三十年、五十年後嘅自己都會噉樣認為。
之所以享受做大人多啲，一來係因為「心智」，二來係因為「自由」。
心智誠可貴
心智會限制自己可以享受嘅嘢。例如細個嘅我只喜歡食甜嘅嘢，覺得全世界最好食嘅嘢就係糖同朱古力，而家嘅我都鍾意食糖，但就覺得點到即止就好喇，呢個世界仲有好多糖以外嘅佳餚；細個嘅我都鍾意睇書嘅，不過可能對於啲作品嘅評價就只係流於片面嘅「好睇」或者「唔好睇」，然後又好依賴其他人嘅認可去判斷一個作品嘅好壞，唔會識得分辨作品「好喺邊」、「有咩地方可以改善」，更莫論堅持己見。
好多人話豬嘅智商大約等於一個三歲小朋友，如果要我變返做一個小朋友，即係我嘅心智需要由而家嘅「大約理解到〈庖丁解牛〉」倒退返去「大約map到『牛』嘅外觀同『牛』呢個字嘅形音義」，我覺得唔okay。
