簡單fact-check：HKU真係見Mirror紅咗先搵返Edan啲相出嚟宣傳？

一句講曬：唔係。

今日見到個噉嘅post。

相片來源：囧報Facebook專頁

編輯用咗「舊生」、「生招牌」呢啲字眼，成篇報導俾我嘅感覺就係「HKU見Edan紅咗，所以特登搵返啲舊相出嚟宣傳。」

雖然Edan人紅多人講係好事。但作為半個出道粉嘅我想澄清一點：

其實呢輯相不嬲都喺度。

呢張係我2021年4月5號 cap落嘅圖。

我係大學教職員，喺啲網上群組識咗HKU嘅同行，咁啱佢都有留意Mirror，所以就分享咗呢件事俾我聽。所以我係喺上個月知道HKU Business School嘅宣傳照有Edan嘅，而呢位行家知道嘅時候只有更早。雖然Edan今年年頭已經開始逐漸竄紅，但都未去到最近開演唱會咁高熱度，我就傾向相信呢輯相係一早影落、一早就用緊嘅。

如果覺得一張四月嘅cap圖唔代表啲咩，且看我娓娓道來。

剎有介事嘅宣傳照

相片截圖自港大經管學院

望返呢張相，三個人特登攞住本Accounting嘅教科書，啲衫又襯曬色，加上女同學嘅一號笑容，Edan嗰隻刻意搭上同學仔度嘅手，背景有陽光又一個閒雜人等都冇。呢啲相難啲係隨手影落然後就擺埋一邊投閒置散喎，點睇都係特登影嚟做學院宣傳照啦下話？

畢業嘅髮型

我哋再睇呢張。