Member-only story
用廿萬讀人文學科換到啲乜？
雙失廢青無病呻吟一下。
May 3, 2019
話說小妹早幾日考咗大學生涯最後一個試（如無意外），呢期喺屋企唞咗幾日，然而已經有唔少長輩問我搵到工未。
嗯，未啊。不過唔係未搵到工，係未開始搵工 –—— 但係我估你都係隨口問下啫，所以無論係未搵定未搵到都冇咩所謂啦嗬？
Year 2 嘅英文堂教Presenting like Ted，我final present嘅題目係廣東話，都係嗰啲老生常談嘅factcheck嘢啦，然後我好記得有個讀business嘅同學，freshman嚟，用好流利嘅英文問我 “Why do I need to know it?”
點解啊？唔⋯⋯冇㗎，因為我想知多啲囉。有咩用？冇咩用㗎，可以知多樣嘢囉。啊！同埋可以話俾人知你知呢樣嘢囉。
說穿了其實就真係冇咩用。之不過，點解一定要有用先？
譬如有日我化咗妝，然後你問我化妝嚟做咩，我可以答你我今日有interview、有約會、要影證件相blablabla⋯⋯但我都可以好單純地想令自己睇落精神啲開心啲啫，係咪？讀書同理，讀書唔一定要實現目的，讀書本身都可以係目的嚟咖嘛。
噉，用廿萬讀人文學科到底換到啲乜？嗱我呢啲學渣就唔敢講換到知識㗎喇，我會話我換到嘅係一個觀看世界嘅角度。至於用廿萬加四年，再加上唔讀文科嘅機會成本嚟換呢個角度值唔值得呢？呢個問題我未答到你，過多幾年再睇下點。
