牆裏的世界

搭火車去三十年後嘅香港。

考完final唔搵工，係因為我要「返」一轉中國先。

小學常識堂教「籍貫」，班上面三十個細路，廿幾個籍貫係廣東、有幾個鄕下喺福建，得我一個默默哋寫低「江西省」⋯⋯不過其實都唔太關我事，都係我阿媽鄉下啫。

因為知道會有好一段時間上唔到網，我download咗幾集《五夜講場》，諗住悶嘅時候可以播嚟打發時間。喺大埔墟出發，等車時已經忍唔住開咗集〈文學放得開〉，主題係「這就是《1984》」。

鄧小樺講得好啱，睇呢本書時個氛圍真係好高壓，情緒好繃緊好辛苦，愛情線出現嘅時候真係舒服咗好多。

到羅湖嘅時候淨係睇咗一半，噉我都未勇悍到夠膽一路睇住人哋評鑑《1984》一路過關嘅，於是要等到喺深圳火車站等車時先睇埋下半集。

過咗關，你就自願走咗入牆內。牆入面嘅世界好弔詭，周圍都寫住「免費 Wi-Fi」但係冇乜邊個係上到，上到嗰啲又要你 log in through WeChat，但係又好神奇，根據我嘅經驗，只要你厚面皮啲撳一撳個制，你就會連到佢個 Wi-Fi，講緊我根本冇 WeChat account。

呢度地係爛嘅、好似濛咗一層灰噉、竹棚隔離會有狗屎、周街都係煙味、喺廁所係需要閉氣。

好討厭。

我係搭長途火車返去嘅，由深圳到南昌大概要十二個鐘（唔係香港嗰個，其實一啲都唔好笑），有床瞓，係好似集中營噉嘅三格床。然後今次好不幸地買咗一號床位。

我諗應該冇乜人有概念，一號床即係行入車廂見到嘅第一張（三格）床，隔一道牆就係洗手間水機，即係會有一堆人喺你腳邊出出入入，但呢個都唔係最大問題，最大嘅問題係：門外就係吸煙區。

而啲出出入入嘅人呢，目測兩個入面有一個係唔撚識「閂門」呢個動作（但佢哋又識開門㗎喎，好神奇）。

於是我瞓瞓下就會俾啲煙味臭醒。

如果吸煙區同非吸煙區之間係冇區間嘅，噉同冇非吸煙區有撚分別？

多撚謝。

千辛萬苦捱到落車，姨丈嚟咗接我哋，一堆的士佬行埋嚟迎接你，然後一聽到你嘅目的地之後就調頭走。

有趣。

條街好多 cam，路牌上面寫住「電子警察」乜乜乜，電幕喺 2019 年原來叫電子警察。

行咗一公里左近，終於截到的士，起標價 8 RMB，去到婆婆屋企原來先 12 RMB ––– 頭先喺火車站姨丈同啲的士佬開價 25 RMB 都冇人肯載。