Member-only story
無綫唔係ViuTV對手，YouTube網媒一樣唔係
如果你硬係覺得唔知喺邊見過呢篇嘢，噉係因為我個Facebook AC俾人bam鳩咗（DKLM）。
唔知喺邊度睇過一個statement：「ViuTV嘅對手唔係TVB，而係Netflix同YouTube網媒。」
拋開Netflix唔講，我覺得ViuTV同香港嘅YouTube網媒從來都唔係競爭關係，反而係互惠互利。
首先，好多ViuTV藝人自己本身都有YouTube channel，Mirror嘅成員拍劇拍綜藝嘅時候會拍vlog，到劇集／綜藝上嘅時候就可以出片，呢個手法除咗係「派糖」俾支持者，亦都係宣傳節目嘅好方法。
除咗藝人自家經營嘅channel，ViuTV藝人都會喺其他YouTube channel亮相。Mirror隊長Lokman拍嘅《狂舞派》上映時就同埋其他演員上咗Whizoo拍《香港人物大字典》；令到更多人認識Mirror嘅《男排女將》播出時，Mirror班仔仔就同Stephy一齊上咗小薯茄宣傳。對ViuTV嚟講，YouTube channel同巴士燈箱、雜誌訪問一樣，都係一個宣傳同曝光嘅機會，而ViuTV嘅觀眾（即係我）被劇集吸引嘅時候，又可以喺YouTube睇到更多藝人喺節目以外嘅面貌。（恕我擅自代姜糖發言）姜B咁得人鍾意，除咗佢喺台上認真跳唱之外，更「圈粉」嘅係佢喺台下傻下傻下嘅反差萌。Viu藝人拍綜藝、上呢啲YouTube節目，其實都係sell緊呢樣嘢，除咗表演，大家可以「窺探」到更多佢哋「真實」（雖然都係俾個cam影住）嘅性格。
調返轉喇喎，（可能因為藝人太少）ViuTV其實都同樣同好多好多網媒成員合作啊，例如《我食飯你埋單》、《總有一瓣喺左近》、《克服他她它》都有邀請ArhoTV嘅Sunny同Creamy；《教束》入面戲份相當多嘅狗榮係由小薯茄嘅程人富飾演（飾演阿Mo嘅麗英就好似係拍完《教束》先加入小薯茄），ViuTV個五周年別注單元劇《嫁喇嫁喇》 — — 吖唔係，《YOLO的練習曲》亦都搵嚟試當真、冬0T成員組成偽女團。我尋晚追《無限斜棟有限公司》，都無啦啦見到試當真嘅豪哥，走去Google，先發現原來套劇根本就係由豪哥同腎仔做編劇。喺呢個去大台化嘅年代，ViuTV一直都同電台DJ、舞台劇演員、YouTube網媒、非本台藝人緊密合作，證明觀眾嘅attention根本唔係零和遊戲，要爭個你死我活，而係合作遊戲，一齊將個餅越做越大。
講咗咁耐ViuTV，然後我哋再睇下某台副總經理153點樣理解「開放」：
「我就很開放的，好像郭偉亮和羅敏莊之前去過ViuTV，但都無需過冷河。」
…………………………你開心就好。
P.S.：Facebook原post幸得鄺保賢醫生留言，佢補充咗黃Viu同Netflix真係競爭對手嚟（都係劇集串流平台），唔知過多幾年，黃Viu會唔會走得再遠啲呢？
