比知道「知識內容」更重要嘅嘢

知道「知識嘅存在」。

Pexels

我讀嗰間大學係出咗名多通識course（「通識」呢樣嘢喺對岸間大學好似叫“common core”）要上嘅。

必修嘅3 cred人文社科、3 cred 自然理科，再喺中國文化、Science、社會科學、哲學四個pool各揀一科嚟讀，然後仲有書院通識中文英文體育電腦，另加自己學院嘅faculty packagesss，total 盛惠48 cred。假設你一個sem讀16 cred，呢堆通識堂要讀足一年半。

啱啱入學嗰陣，見好多人都詬病通識課程嘅存在——覺得學唔到嘢啊、浪費credit／時間搞到佢哋冇辦法專心讀本科啊、拉低GPA啊……道聽塗說下，我對呢啲通識堂都冇咩好感。

之但係就算冇咩好感，為咗畢業都係要頂硬上。讀下讀下，我又覺得幾開心。

我主修同副修嘅都係一啲比較專門同離地嘅學科，如果冇上述嘅通識堂，其實我真係可以對個世界一無所知。但係我喺上述嘅通識堂入面學到好多改變咗我視野嘅概念——馬克思女性主義、資本主義嘅無形之手同異化、佛洛伊德嘅自我本我超我、Philia Eros Agape……你問我係咪個個概念都好了解，噉就梗係唔係啦師傅，我連本科啲嘢都開始唔記得喇大佬，之但係我好記得我讀文化研究個教授講過：

你讀一個course，咩筆記都可以唔見，唯獨是Introduction同bibliography唔可以唔見。

於是我哋返到文章嘅主旨：比起知道知識嘅內容，知道知識嘅存在係更加重要嘅事。

知道某個概念，就好似save低咗一個目的地，只要有適當嘅工具（無論係路人、地圖定係衛星導航），你就可以隨時到達目的地。就好似我喺通識堂知道有馬克思女性主義呢個主張，如果我半年後對相關議題感興趣，我就可以搵返相關嘅資料出嚟睇。之但係如果你連個目的地都冇，噉無論你有幾好嘅GPS，有幾靚嘅座駕，都只係嘥氣。

外界嘅刺激

我做過一年保險——老實講真係一件random到我自己都唔信嘅一回事，但係我同時覺得呢個經驗好寶貴。唔係因為工作上嘅需要，我估我都唔會有咩機會接觸到破產相關嘅資訊、唔會知道網絡醫生俾保險公司壓榨得幾甘——呢啲其實唔係咩機密資料，基本上上網撳個掣就會show曬出嚟俾你睇。但係喺歲月靜好嘅閒暇，我都幾肯定自己唔會無端百事搵呢啲資料出嚟睇。於是我都幾體會到，外界嘅刺激甚至逼迫，其實都對個人成長同增值相當有幫助。

潮流書單

作為一個圖書館打雜，我日日都喺度謀算緊可以點樣善（濫）用公司資源作自我提升。於是最近我不斷搵唔同嘅書單出嚟睇。睇嚟睇去，我發現啲熱門推薦書單（同埋Medium熱門文章）嚟嚟去去都不外乎呢幾類：