每當你同戇鳩仔傾一分鐘偈，你就失去咗六十秒

時間就係金錢。

早兩三年，當我仲係個大學生時，我熱衷喺各大社交平台同人罵戰（我過往某啲文都有分享過），一來享受被觀戰嘅花生友嘅endorse，二來我覺得噉樣可以令我嘅思辯能力有所增長。每當我諗到一句好mean嘅回覆，又或者我某條好mean嘅留言收到好多reaction，我都會不亦樂乎為之沾沾。有時我覺得自己係紀曉嵐，有着一副銅牙鐵齒；有時我覺得自己係觀音菩薩，啲人咁撚蠢我都願意普渡眾生。

直到我出咗社會做嘢，我先發現自己係個泥菩薩。

選擇就係捨棄

其實我從來都冇讀過econ，我第一次接觸機會成本呢個概念，係我讀大學時幫個中三妹妹補EPA，佢份notes講到呢樣嘢，我就極速噉「自學」咗一次咩叫機會成本然後即刻教返佢轉頭。

做一樣嘢嘅機會成本（opportunity cost）係指「做佢而放棄咗嘅選擇當中最有價值嗰個」。（粵文維基）

如果你將同戇鳩仔傾偈所浪費嘅時間拎嚟做運動，你嘅身體會更加健康；如果你將同戇鳩仔傾偈所浪費嘅時間拎嚟睇書，你會有知識上嘅增長；如果你將同戇鳩仔傾偈所浪費嘅時間拎嚟寫medium星星文，你會多咗一個被動收入來源。

年青人，究竟有咩動力，驅使你不惜放棄金錢智慧健康，都要去同戇鳩仔泥漿摔角啊？

意識到呢樣嘢之後，「戇鳩嘢唔想理」同「你嘅時間可以用嚟做更有意義嘅事」成為咗我人生中兩句好重要嘅座右銘。返工已經剝奪咗我人生三分一嘅時間，點解我仲要浪費僅有嘅時間去同一啲唔重要嘅人罵戰，俾啲戇鳩仔污染我嘅心靈？罵戰係一件好傷元氣嘅事，而用得「罵戰」呢個詞語去總結成場對話，即係對方都打算冇改變自己嘅諗法，賠了時間又傷神，就係為咗一時虛榮，施主又何苦呢？

Stop making stupid people famous, PLEASE

玩咗咁多年社交媒體，有樣嘢我真係諗極都諗唔透——到底點解要特登share對家啲嘢嚟恥笑？我已經超過一年冇睇過TXB，但就唔知點解成撚日都會喺Facebook IG見到啲黃絲朋友特登share佢哋嘅近況；又例如最近某集團請MT，又成棚人衝出嚟幫對家宣傳，你噉做係幫緊對家增加曝光率啊！有幾多人本身根本唔知個集團請MT，俾你share一share，搞到街知巷聞。你估多咗人知道呢件事之後，係多咗人報嗰份工嘅機會大啲吖，定係少咗人報嘅機會大啲？Share啲戇鳩新聞content farm share得咁慷慨，唔見你share下我啲文？係咪因為我唔夠戇鳩唔夠耀眼？