Member-only story
毋忘初衷的弔詭
又到年尾。
可能係年尾特別多所謂總結同展望，或者係純粹放咗個假鳩hea咗一排所以多咗嘢諗，再或者係因為作為社大freshman嘅我返咗半年工依然喺石屎森林入面戇鳩鳩咁，我今日一路扮工一路喺度諗一樣嘢：
有啲人（通常就係我呢啲社大freshman）成日將「毋忘初衷」掛喺嘴邊，其實呢句嘢係咪presuppose咗「當下嘅自己一定係啱曬」呢個自大嘅前提呢？
同大家講個故事：
喺我仲係個十𡃁歲嘅八婆（不過其實我而家都係廿𡃁歲咋，我還年輕、還年輕）嘅時候，我同啲同我一樣都係十𡃁歲嘅朋友喺度討論其他女仔嘅衣著。嗰期好興露腰嘅短身上身衫嘅，我同嗰班朋友就覺得呢類型嘅衫太暴露。我記得當時有個朋友話「我真係接受唔到露個肚出嚟囉，就算我冇肚腩我都唔會想露個肚出嚟。」
過咗兩三年，呢個朋友真係減肥成功，身材好好冇曬肚腩。然後佢嘅社交媒體account都多咗好多露腰嘅相。
嗰陣我呢個八婆喺度諗：其實呢個人都幾善變㗎喎，未減肥嗰陣就喺度judge人哋嘅衣著，到自己有本錢時就即刻着埋一份，一啲都唔貫徹始終嘅。
經過四年得閒就同同學展開無聊辯論再得閒啲就上網接受下哲學荼毒嘅大學廢青生活，而家嘅我諗返起以前嘅呢個朋友（erm冇錯係以前嘅朋友），我諗到嘅係：如果佢嘅諗法改變咗，佢覺得女仔無須被外在社會嘅價值觀影響佢嘅衣著，咁佢嘅思想係進步咗㗎喎。如果一個人嘅「初衷」會窒礙佢嘅成長同進步，咁「遺忘」甚至「遺棄」初衷，又有何不可？
相信好多人都會認同大學嘅思辯訓練將自己塑造成為咗更好嘅人（嗱其他學院我唔熟，起碼我文科仔係啦），好多嘢打破咗自己舊有嘅思想，然後我哋又一步一步重新建立截然不同嘅價值觀。喺你修正轉變自己嘅時候，你又會唔會覺得忘記自己嘅「初衷」係一件可恥嘅事？
我以前係個講嘢好直接好討厭嘅人（都話我係八婆咯），嗰陣我成日覺得咁樣好true，咁樣先係「做自己」，覺得嗰啲講句嘢都要察言觀色自我審查嘅人好假又好廢。但係抱住呢個「初衷」撞過N咁多次板之後，我發現尊重同顧及他人感受比起一時嘅口爽更加重要。雖然可能而家嘅我講嘢都仲係好乞人憎好幼稚，但至少我覺得自己喺思想上係成熟同進步咗。我諗，如果而家嘅我遇到以前嘅我，佢哋應該會同樣地討厭對方。但而家乃至將來嘅我要做嘅，應該係時刻檢討改進自己，而唔係喺度摷返啲陳舊倉底嘅所謂初衷出嚟檢查我有冇遺忘佢哋囉。
希望十年後嘅我都會記得要「時刻檢討改進自己」呢個「初衷」啦^o^
