Member-only story
文科生嘅身份危機
發下牢騷。
最近意識到自己做緊份工冇乜前途可言，於是好努力噉搵工，見到好多job ad list出嚟嘅requirement都要有專業技能（例如programming）或者指定學位（例如BBA），覺得自己開始經歷身份危機，於是心郁郁想學啲容易寫落CV嘅技能去增加自己競爭力。
喺office坐我後面嘅同事做Business Analyst嘅，出於好奇同「上進心」，我請教咗佢一啲programming相關職業嘅發展路向、性格同技能要求之類嘅資訊。
同事答得好詳盡，不過佢答得越仔細，我嘅自卑感就越大 – – 好多人長於一樣hard skill，已經有好好嘅職業發展；我DSE可能高佢哋三五七分，但就因為修讀嘅學科性質關係而喺CV上面「一無是處」 – – 唔通喺CV寫自己個medium有幾多個views咩。
打到呢度利一利申先：我絕對冇睇唔起識programming或者讀business嘅人。比較貼切地形容，我應該係後悔。不過唔係後悔入咗中文系，而係後悔自己冇喺在學期間認真建立一啲見得下人嘅hard skills，搞到而家嘅事業發展噉嘅樣。
當然it’s never too late，我到而家都仲可以亡羊補牢嘅，但係先唔講學習同吸收能力會隨住年齡嘅增長而下降，出咗嚟做嘢之後先去學一樣新嘅技能，真係要自己好有恆心同毅力，好好善用時間先得啊。
喺我暗暗地籌算自己要由邊度開始學、大概有咩目標時，我後面嗰位business analyst同事突然同我講：「我有啲嘢想請教你啊。」
因為頭先佢好有耐性噉答我嘅問題，我都即刻正襟危坐，好認真噉靜候佢嘅發問，希望可以回報返佢。然後佢將佢嘅問題娓娓道來：
「我想問呢：“Full stop”其實點串㗎？」
我呆一呆，然後故作鎮定地串咗一次俾佢聽。佢好似未get到其實係兩個好普通嘅英文字嚟，於是我又再引伸一下：「一個完整嘅停頓，咪Full Stop lok1。」當佢知道咗原來full stop嘅串法係如此簡單直接時，佢好驚訝又好如獲至寶地講咗句：「嘩！真係學到嘢！」
雖然soft skills真係好唔起眼，但只要肯默默磨礪，好似都總有露出鋒芒嘅機會。
喺度偷偷地多謝嗰位同事解答我資訊性嘅問題之餘，都稍稍開解咗我嘅身份危機。
