Member-only story
文以載道的不安
May 16, 2019
有時見到有人分享自己寫嘅文真係有啲百感交集。
一嚟係好清楚自己寫得唔夠好，應該可以寫得再好啲，好記得上現代詩寫作坊聽過夏宇嘅一句說話：
我發現對我寫過的詩我差不多都是不安的因為我沒能把它們寫成另一種樣子
雖然文章同詩有啲唔同，應該寫極都唔會做到改頭換面，但我去到pub嗰下都仲係覺得我寫得唔夠好，睇返都覺得辜負咗篇文，但係同時我又好驚再拖落去會冇咗令篇文面世嘅衝勁，所以選擇出完再慢慢執 —–– 既然執極都有得執落去，倒不如出咗再算。
寫得唔好係技術上嘅問題，核心嘅問題應該係寫文呢樣嘢自身嘅矛盾 —–– 明明好清楚自己寫文係為咗將自己嘅信念傳遞去非同溫層，但同時又好擔心會惹嚟嘲諷謾罵。
喺medium出文以嚟，呢種不安出現過兩次，一次係雅正中文，講廣東話factcheck，第二次係頭先出嗰篇講素食嘅。
如果你有留意，前者嘅文風好明顯係鋒利好多 —–– 寫得再差都好，假假哋我都係中文系嘛（希望可以順利畢業），但係素食嚟講，我根本仲未離開新手村，好擔心言多必失，所以儘量客氣，同時提醒自己遇到有理據嘅反駁指責一定要虛心受教，如果唔係只會淪為自己睇唔起嗰種人。
見今日多咗幾位followers，決定轉個正經啲嘅個人簡介，方便路過嘅朋友知道我係咩人：
中文系學生，相信文以載道，但更相信道成於文。
「文以載道」相信大家聽得多，至於「道成於文」，係因為我覺得，比起寫文伊始就有「道」嘅存在，我更加偏向「道」係喺寫文期間慢慢噉被摸索成形 —–– 應該係因為我唔夠叻，不過好在「道成於文」係可以將勤補拙。
