Member-only story
如何定義網友
睇緊呢篇文嘅你同我，又算唔算網友？
網絡友誼（Internet friendship）是指人與人透過互聯網上發展出來的友情，在許多情況下、只是透過互聯網互相了解，與筆友有相似之處，但不僅是透過文字，也可以透過聲音、影像或虛擬角色。（維基百科）
喺我十一二歲，Facebook尚未（喺香港）興起時，我有寫過Yahoo Blog同Qooza，嗰陣撳下撳下，就會唔知入咗邊個個blog度，搲下「CM」又搲下水吹，都叫做識咗一個半個「網友」。
後來Facebook開始普及，「網友」越識越多。玩咗咁耐Facebook，有啲add咗十幾年嘅人，間唔中會like下對方啲post，甚至comment一兩句，但係冇實實在在噉PM過對方。你知道佢咩樣，知道佢讀邊間小中大學，甚至知道佢而家做緊邊行，但偏偏就係冇見過真人。呢啲算唔算網友？
人大咗會有唔同嘅興趣嗜好，線上嘅興趣型群組越join越多，我入咗《粵典》編輯組嘅Facebook group先同前總編阿擇 （Chaaak）、現任總編謝一了第一次見面。但係同時仆擇係我大學師兄兼粵研助教，謝總係我而家讀圖書館證書嘅同學，噉我同其他人介紹佢哋時，應該話佢哋係我做義工時識嘅朋友、係我大學師兄／證書課程同學，定抑或係網友？同埋我都好好奇，「網友」呢個身份，到底係會就住大家結交嗰刻使用嘅渠道而永遠地保存落去，定係喺大家初次見面、驗明正身之後就會自動失效？
智能手機普及咗之後，上網識人越嚟越易。就算第一次認識對方係喺現實世界，後續好多時都係依靠互聯網維繫感情同關係。我哋身邊大部份朋友，其實都係因為上網而結識，又或者係透過上網維持落去——除咗喺工作、學校環境遇到嘅人。
然後我哋遇上武漢肺炎。
我有個大學同學，佢今個學年開始教書，間中會喺IG story update下自己同學生之間嘅趣事。不過礙於肺炎，大家好多時都係online learning而唔係face to face上堂。臨近聖誕，佢預備咗啲零食同咭仔俾佢啲學生，啲咭仔嘅上款寫住「親愛嘅網友」——原來online learning同work from home令到我哋同同學、同事都變埋「網友」。
唔知十年八年後，我哋會唔會有一個特定嘅詞彙，係專門指涉「喺現實世界發展出嚟嘅友情」呢？
PS：呢篇文趕喺今日出，因為聽日我約咗班同行(hong4)網友gathering（用zoom，都係見唔到實體，唔會犯599G，放心），呢篇文就當係送俾大家嘅「聽聲禮」啦～
（網友們心諗：送俾我我都唔要。）
