關於錢銀嘅幾件瑣碎事

社畜奇啲嘅價值觀。

薯粉

有間好出名嘅米線舖，佢哋啲薯粉好好食，間嘢有五間分店，但五間都喺屯門。

有時放假癮起會好想食嗰間舖頭嘅薯粉，我就會特登搭車過去食。

我自己一個食，大概會食六七十蚊嘅嘢，半個鐘左右已經食曬。但來回車費其實都要十零蚊，而我由屋企出發去到嗰間舖頭都差唔多要成一個鐘。

即係其實比起嗰區嘅居民，我都要付出相當多嘅成本（金錢+時間+體力）先可以食到嗰碗唔算特別貴嘅薯粉。

但係嗰度啲薯粉係真係值得我噉做——至少我覺得值得。

即使同區已經有譚仔同傷心酸辣粉諸等定位接近嘅舖頭，我依然係間唔中就會自己一個跋山涉水跨區去食薯粉，食完就即刻搭車返屋企。

不過就，如果你問我——到底係因為嗰間舖頭嘅薯粉真係咁好食，所以我捨得山長水遠入屯門；定其實係因為我山長水遠入屯門，所以我先至覺得嗰間舖頭嘅薯粉咁好食呢？

其實我都唔知。

當事薯粉。

剪頭髮

武漢肺炎啱啱開始嗰排，我日日都work from home，除咗屋企人就咩人都唔駛見。

嗰陣我啲頭髮又長又亂，洗頭都嫌嘥洗頭水。但因為我根本唔需要點出街見人，我又懶得特登俾錢出髮型屋剪頭髮。

於是我就懶醒，上網搵教學自己剪。

其實即係求其紥條辮，然後拎把最普通嘅較剪，一嘢剪落去。

第一次自己剪頭髮嘅經歷唔算太差，如是者我自己剪過幾次，越剪越衰，有時剪漏咗一撮，有時又剪到歪曬，不過我都闊佬懶理——反正都唔駛見人。

直到我準備返新工，醜婦終須見家翁。

我發現我個頭實在太柒，點梳都係柒，於是終於認命去髮型屋搞搞佢。

我去咗電負離子直髮，包洗剪吹。但係我嗰陣啲頭髮已經係完全冇髮型可言，加上我啲頭髮又多又厚，所以個髮型師係要由零開始幫我剪返個形出嚟。

個髮型師喺度夾夾夾、剪剪剪，剪完又夾，夾完又剪，個髮型師剪咗好耐，我就坐咗好耐。