《返中學探老師，結果見得最多嘅係個新嚟嘅阿Sir》番外篇

「異性戀問題要用異性戀方法解決。」

第一集

*

自從我同咗阿樂一齊之後，Darren日日都喺度纏住我請佢食出pool飯。

「你呢個忘恩負義嘅女人，我辛辛苦苦為你打咗半壁江山返嚟，你就係噉樣對待你嘅忠臣？」

⋯⋯阿樂幾時變咗半壁江山？

「你哋就話有情飲水飽啫，可憐我呢支賣女孩嘅小火柴，日日忍受閃光彈狙擊不突止，仲要捱凍捱餓，不得溫飽，真係世態炎涼，人心叵測啊！」

佢係咪飲醉咗？

「你就請佢食啦，最多我出一半錢喇。」阿樂一邊預備訂書單，一邊同我講。

「其實你哋嗰日到底講咗啲咩？」喺猶豫緊嘅時候，我突然諗起Darren同阿樂曾經有場對話。

阿樂手上嘅動作停咗片刻，然後又若無其事噉繼續扮工：「⋯⋯你到時自己問佢啦。」

古古怪怪噉。

最後我承受唔住Darren嘅催眠，逼於無奈請佢食咗餐飯。

個衰仔仲要特登揀咗間貴價cafe。

「終於識得飲水思源喇咩？」Darren好得戚噉講。

「你嗰日到底同佢講咗啲咩啊？點解一傾完佢就同我表白？」

Darren露出狡黠嘅笑容：「異性戀問題要用異性戀方法解決。」

「⋯⋯即係點？」

「你呢啲蠢女人一世都唔會明㗎喇。」

Darren同張樂明行到個冷清嘅角落，兩人面對面企，稍微矮過Darren些少嘅張樂明環抱雙臂，神色凝重，Darren雙手插袋，定睛望住張樂明。

Darren：「你係咪追緊Joanne？」

「係。」張樂明不假思索地回應。

Darren腦袋高速運轉：「我哋公平競爭吖。」

張樂明冷眼望向Darren：「你憑咩同我爭？」

「你知唔知Joanne最鍾意食咩、最憎食啲咩、有咩口頭禪、DSE考幾多分、開心嘅時候鍾意點慶祝、唔開心嘅時候會去邊度散心？」

張樂明：「⋯⋯知又點，唔知又點？」