《返中學探老師，結果見得最多嘅係個新嚟嘅阿Sir》(6)

「好可惜，知道你嘅感情狀況對我嘅人生一啲幫助都冇。」

個人覺得呢集寫得麻麻，臨post之前改咗少少，希望唔會太矯情（汗）

第一集 ｜ 上一集

*

「Joanne？你嚟咗嘅？」佢叫停我。

「咦？哦，係啊，嚟還書。」冇得扮睇唔到，我唯有勉強擠出一個禮貌嘅微笑。

「上次本書睇完嗱？咁快手嘅！」佢有啲驚訝。

「係⋯⋯我睇書都幾快。」

「我見你冇喺ig打書評，以為你唔得閒睇，前日先幫你續借咗。」

佢做咩要咁留意我？

「睇完喇，呢排好多assignment，未得閒打書評——我返屋企先喇，聽晚有份功課deadline。」我冇講大話，聽日真係有份功課deadline，雖然我一早交咗。

「我都未講完，咁心急走做咩啫？」我已經向前行咗半步，但都係俾佢叫停咗。

「吓？你仲有咩要講？」

佢吸咗一啖氣：「嚟之前講聲嘛，打波我可以推。」

「你噉樣同其他女仔講嘢，你女朋友唔會嬲㗎咩？」我有少少戥佢女朋友唔抵，一唔小心語氣重咗。

「吓？」佢先係呆咗呆，然後失笑問我：「女朋友？點解我有女朋友我自己都唔知嘅？」

「吓？咩啊？頭先個女同學明明同我講⋯⋯」我講到一半發現唔對路，即刻停咗口。

爭啲將女同學誤會我係佢女朋友件事講咗出嚟。

「個女同學同你講咩啊？」

「冇嘢！」打死我都唔會同佢講。

阿樂用狐疑嘅眼神望住我，見我不斷逃避佢嘅目光，佢沉默半响，最後終於徐徐開口：

「啲學生係咁八卦㗎啦，成日走嚟問我有冇拍拖、結咗婚未，但係我從來都唔會答呢啲私人問題，因為知道我嘅感情狀況對佢哋嘅人生一啲幫助都冇。」

「⋯⋯」我俾佢義正辭嚴嘅人生道理震懾咗。

「我唔知個女同學同你講咗啲咩啦，不過佢好有可能係想套你料，試下可唔可以喺你把口度搵到啲咩蛛絲馬跡。」佢停咗停，小心翼翼噉望住我：「但係我真係冇女朋友。」