Member-only story
《返中學探老師，結果見得最多嘅係個新嚟嘅阿Sir》(5)
「唔通你就係張Sir女朋友？」
Mar 11, 2022
之前聽啲前輩分享喺Medium連載小說係票房毒藥，所以我都冇抱咩期望，反正本身都係諗住自娛。結果反應比我想像中好，多謝大家支持～目前我寫緊第十集，開始咗收尾了，成個故仔最多應該都係得十零集，大家唔想追live嘅話可以一個星期後返嚟睇～～
*
我成功用「大家噉話」強行終止咗場對話。之後嗰個星期我哋都冇任何交流。
阿樂有時會用ig story同學生互動，例如搞埋啲咩「小說vs散文」投票，又或者叫同學分享佢最鍾意嘅書中句子。
不過佢share返出嚟嘅回覆寥寥可數。
呢日我晏晝兩點半就放咗學，本《圖解社會學》我已經睇完，見差唔多到期，我決定今日返去還咗佢。
雖然阿樂話可以續借，但係一嚟我睇書速度都幾快，二嚟我唔想麻煩佢，不如索性早啲還咗本書算，費事心掛掛。
距離上次返去同Miss Lee食飯只係過咗個零禮拜，門口個保安認得我，講咗句「你咁有心嘅！成日都返嚟探老師。」
「⋯⋯咁啱呢排得閒嘛。」我尷尬笑咗笑，唔好意思同佢講其實我只係返嚟還書。
我行到圖書館門口，唔知點解有啲緊張。
佢今次會唔會同我講啲咩呢？
一入到去，我即刻望向門口附近嘅櫃枱。
櫃枱得個女同學喺度做功課，阿樂唔喺度。
唔通佢同緊其他學生傾偈？我掃視咗成間圖書館一次。
但佢真係唔喺度。
「唔喺度仲好啦！冇人喺度窒住晒！」我唯有噉樣同自己講。
「唔該，我想還書。」我將本書遞俾當值嗰位女同學。
女同學個樣有啲遲疑，應該係不解緊點解有個着便服嘅女仔入嚟話還書。不過佢見到書上面個「張Sir精選」貼紙，確定咗本書真係佢哋嘅館藏之後，就冇特別問啲咩，幫我還咗本書。
「咦，點解本書係張Sir借嘅？」女同學望住個mon自言自語。
「⋯⋯」我一時之間反應唔切。
佢突然雙眼發光：「唔通你就係張Sir女朋友？」
