《返中學探老師，結果見得最多嘅係個新嚟嘅阿Sir》(3)

「叫我阿樂啦。」

嚟到第三集，想戴定個頭盔先：呢個真係一個冇乜營養嘅愛情故事嚟，我純粹寫嚟滿足下自己想睇純愛故嘅慾望。大家酌量睇，唔好expect睇完可以學到啲咩orz

第一集 ｜ 上一集

*

可能我個驚訝樣太過浮誇，張Sir見到之後笑咗出嚟 – —其實佢笑起上嚟都幾好睇，嘴角上揚嘅幅度唔會太大，係比較含蓄嘅笑容嚟，俾人感覺非常有教養 – —不過呢個唔係重點，佢係咪恥笑緊我，我應該點部署？

「真係順便㗎咋，反正屋企冇位擺，學校又肯收，啲書買都買咗，如果啲學生睇完可以有所得益，都算係做到效益最大化吖。」

「如果你早幾年入職就好喇，噉我就可以幫你手增加效益。」我收起驚訝嘅表情，估唔到呢個新阿Sir都幾有諗法。

「呢層你又真係幫我唔到喎。」佢放返本書落書架，然後面向我，剎有介事噉話：「你中學畢業嗰陣，我仲讀緊大學咋。」

我忍唔住藐咗佢一下：「欸⋯⋯張Sir，你係咪想講自己好後生？但明明呢度所有人都後生過你。」我環顧一周，圖書館入面得佢一個老師，佢的確係全場最老。

「OK，我認輸。」張Sir舉起雙手作投降狀，無奈噉回應。

「 – —不過你唔好叫我張Sir啦，你又唔係細我好多。」

「又係你自我介紹時話自己叫張Sir嘅。」我不滿。

「⋯⋯係我唔好。」情勢開始逆轉，佢連認兩次低威。

「叫我阿樂啦。」

呢個名聽落後生咗勁多，好似同輩噉。

其實計返我哋好似真係同輩嚟，但係我唔係太想噉樣嗌佢。

「你冇英文名㗎咩？」

「有啊，英文名叫阿Ming。」

「點解你中文名叫阿樂但英文名叫阿Ming？係咪好似啲古人噉，咩張樂，字明，噉樣？」我皺眉。

聽到我喺度一本正經噉亂噏廿四，張Sir冇我咁好氣：「我叫張樂明。」

見我欲言又止，佢又笑住補咗句：「個名我父母改嘅，我都唔知點解。」

⋯⋯呢個人真係好過份。明明頭先企喺我面前嘅仲係個斯文有禮嘅儒雅書生，點解我而家好似俾個書生恥笑緊嘅？我哋唔係識咗好耐咋喎——咪住先，而家幾點？

我望望牆上嘅鐘，12點25分。