《返中學探老師，結果見得最多嘅係個新嚟嘅阿Sir》(12)

「128.46」

第一集 ｜ 上一集

*

佢哋行開之後，我企喺原地等咗好耐好耐。

我完全聽唔到佢哋講乜。淨係離遠見到阿樂蹺埋對手放喺胸前，同埋Darren兩隻手插緊袋。

一段漫長而艱難嘅等待過後，我見到Darren好chok噉擰轉頭行向我，行緊過嚟嘅時候仲對住我單咗下眼。

⋯⋯搞乜？

「出pool記得請我食飯。」Darren刻意壓低聲線：「我去搵Becky先，你哋慢慢。」

佢臨走之前仲拍咗拍我膊頭。

呢個時候，阿樂都行咗過嚟。

「你而家得唔得閒？」阿樂問我，語氣有啲焦急。

「⋯⋯做咩？」

「跟我嚟。」

佢喺我前面帶路，每行幾步佢就會擰一擰轉頭，睇下我有冇跟甩咗。

轉眼間我哋嚟到圖書館門口。

「你喺度等我一陣。」

我抬頭望住佢。

「⋯⋯好快。」佢輕聲補充。

「嗯。」我點點頭，然後佢一個人行咗入去。

等緊嘅時候，我不斷喺度諗應該點同佢道歉好。

諗諗下佢就出咗嚟。

佢幫我頂住道門：「可以入嚟喇。」

圖書館燈光微弱，淨係得最入面嗰一排嘅燈着咗，同埋門口嗰樖聖誕樹嘅燈飾喺度閃閃下。

感覺⋯⋯有啲浪漫？

我入咗去之後，佢鎖埋咗道門。

「⋯⋯唔好誤會，我冇任何不軌企圖。」佢表情有啲尷尬：「純粹係驚有學生白撞。」

我笑咗出嚟：「我知道。」

「你同Darren⋯⋯識咗好耐？」

「⋯⋯Form 2識到而家，都有成七八年。」

「噉，你同佢⋯⋯有冇機會一齊？」佢向我投以試探嘅目光。