Member-only story
《返中學探老師，結果見得最多嘅係個新嚟嘅阿Sir》(11)
「你哋啲異性戀真係好鬼麻煩。」
*
我嘗試過反抗，奈何我唔夠Darren大力，只好任由佢拖曳我嘅身軀。
去到籃球場邊，Darren右手好自然地晾咗喺我左邊膊頭，興致勃勃噉四處張望。我唔敢望向籃球場，唯有耷低頭扮撳電話。
諗深一層，其實我根本就唔係嬲緊阿樂，而係嬲緊自己冇問清楚佢嘅口味就一廂情願噉喺度整曲奇。
不過而家呢個場合好尷尬，我都唔方便同佢道歉住。
「咦？嗰個着住黑色波衫嘅靚仔好生面口喎，係咪新嚟嘅阿Sir？」Darren喺我隔籬發晒姣噉。
「係咩？唔知喎。」我視線冇離開過電話，不過唔使望都知佢講緊邊個。
「喂，戴仲儀，咪咁敷衍好冇？你好歹望一眼先吖！」
「唉，係喇係喇。」我冇佢辦法，唯有象徵式抬頭望一望。
然後就唔小心同阿樂嘅視線對接咗。
「頭先做咩突然走咗去？」阿樂行到我面前，語氣平直噉問我，我完全冇辦法從佢嘅聲音聽出絲毫情緒。
但佢雙眼一直望實Darren搭喺我膊頭上面隻手。
Darren俾阿樂嚇親，佢好驚訝噉問我：「你哋識㗎？早講嘛，唔介紹嘅？」然後又滿面笑容噉向阿樂伸出右手：「Hello，我叫Darren啊，係Joanne同屆同學。你點稱呼啊？」
阿樂定睛打量咗Darren一番，最後目無表情噉同Darren握咗下手：「叫我張Sir得喇。」
比賽準備開始，阿樂行到球場中間，留低我一個喺球場邊承受Darren審犯噉審嘅目光。
彈指間，Darren好似悟透咗啲咩：「唔怪之得啦！」
我感覺到自己塊面好灼熱：「又點啊？」
Darren對住我奸笑：「我哋嘅Joanne終於大個女喇。」
我避開Darren嘅視線：「都唔知你講乜！」
Darren：「下話？你冇興趣我就去馬㗎喇。」
「喂你咪——」
「講笑啫。」Darren擺一擺手：「你啲曲奇就係整俾佢食？俾咗佢未啊？」
「本身係噉打算嘅，不過原來佢唔鍾意食甜嘢⋯⋯」
「你哋啲異性戀真係好鬼麻煩。」
比賽嘅情形有啲一面倒，阿樂今日嘅狀態冇我第一次見佢打波咁好。射籃同傳球都有唔少失誤，仲俾人吹咗兩次走步。
雖然有其他阿Sir力挽狂瀾，但老師隊最後都係輸咗五分。
比賽完咗之後，Darren即刻嗌住阿樂：「張Sir，方唔方便傾兩句？」佢無視我惶恐嘅眼神，補咗句：「我哋兩個。」
「好。」阿樂望咗我一眼。
Darren一隻手搭住我膊頭，摀低身喺我耳邊好陰聲細氣噉講咗句：「你留喺度等我，好快返嚟。」
⋯⋯佢到底想點？
*
