「你甩咗鞋帶啊！」

一廂情願嘅熱心腸。

有日放工喺個campus度行，行行下見到前面有個同學條鞋帶喺度揈下揈下。

佢向前行咗幾步，過埋條馬路，搵咗個冇乜人路過嘅地方，踎低，然後綁返好條鞋帶。

呢個同學令我諗起，唔知點解以前我每次喺街邊甩鞋帶，都會有啲不知名路人阿嬸（通常都係阿嬸，唔知點解）同我講「阿妹，你甩咗鞋帶啊。」

而每次聽到呢句嘢我都會好忟憎。

甩鞋帶本身就係一件好麻煩嘅事——你要步步為營慎防kick親，然後要審視周邊環境，物色一個容許你踎低綁鞋帶，而又唔會阻住條路（或者俾人踢到）嘅地方，總之每次我甩鞋帶時都會有少少壓力。

加上唔知點解我份人天生就好易甩鞋帶，我一日可以甩成四五六七八次鞋帶，每次甩鞋帶就要重複一次上述步驟，就更加令我心生煩厭。

而當喺我一邊小心行路，一邊苦惱緊邊個位適合我停低綁鞋帶時，身邊突然殺出一個「熱心路人」走嚟同我講「你甩咗鞋帶啊」時，我就會好無奈又好忟憎——噉你係咪想我原地踎低，塞撚住成條路，冒住發生人踩人命案嘅風險都要綁埋條鞋帶先——其實連你都睇到我甩咗鞋帶，點解你會覺得着鞋嗰個會唔知？鞋帶喺對眼前面㗎喎，唔係背囊冇拉拉鏈喎。

其實我都知對方係好心，但我成日都好怕呢啲一廂情願嘅熱心腸。講起呢啲「一廂情願」，我諗起有次我同朋友訂咗喺某間餐廳食lunch，間餐廳要提前一日嗌定嘢食，餐牌上面唯一嘅素食option係「黑松露乜乜柒柒」，由於我好怕黑松露陣味，所以我嗌咗個卡邦尼意粉走煙肉。

結果餐廳個職員覆我「但係卡邦尼意粉走煙肉就會變咗淨係得忌廉汁㗎喎，你會唔會想轉牛肝菌汁？我會幫你走蔥蒜，其實A餐（即係嗰個死人黑松露）都係素……（佢真係打埋啲省略號出嚟）」

我appreciate佢嘅熱心腸，但係我睇到message嗰下就只有反感。一嚟我唔係盲嘅，我知道A餐係素食，二嚟我從來冇話過我係食宗教素，唔需要你擅自幫我走蔥蒜。你嘅好心腸反映出嚟嘅就係「你覺得我諗嘢冇你咁全面」同埋「你以為自己好了解我嘅需要」。

Er……唔駛喇，唔該。

我後來買咗對唔駛綁鞋帶嘅鞋，自此行街唔需要再擔心甩鞋帶，都唔需要擔心有人好心提醒我甩咗鞋帶，生活輕鬆咗唔少。