Member-only story
「你鍾意我啲咩？」
我鍾意你係你。
本身其實係想寫關於語言平等嘅嘢，起完個大綱，發現想講嘅嘢 阿擇 （Chaaak）之前都講得七七八八。我呢啲小薯都係決定轉個輕鬆啲嘅面向，吹下水就算。我鍾意你……
自問唔係嗰啲鍾意問另一半「你鍾意我啲咩」嘅煩膠（不過如果佢肯講嘅話我都鍾意聽），反而我係個成日都會讚男朋友嘅擦鞋仔嚟。
（以下言論帶有超重女友濾鏡）我成日話自己男朋友係個絕世筍盤——又得意、又靚仔、又乖仔、又聰明、轉數又快、又錫我、唱歌又好聽、又識工程又識歷史……總之係天上有地下無嘅宇宙級男友啦。
雖然我覺得我男朋友係全世界最好，但係如果卸下女友濾鏡，我依然好理性地知道，呢個世界上聰明過佢、靚仔過佢、高過佢、博學過佢嘅人大有人在。
哲學問題一：如果你發現同你一齊咗十年嘅另一半，原來有個失散多年嘅孖生兄弟／姊妹，無論係樣貌定性格，甚至收入，同你另一半相比，都有過之而無不及，你會唔會放棄你另一半，轉而同佢嘅兄弟／姊妹一齊？
哲學問題二：如果你發現你默默暗戀咗三個月嘅對象，原來有個孖生兄弟／姊妹，無論係樣貌定性格，甚至收入，同你暗戀對象相比，都有過之而無不及，你會唔會放棄暗戀佢，轉而暗戀佢嘅兄弟／姊妹？
我冇做過任何問卷調查，所以唔知普羅大眾對上面兩條問題有咩諗法，但係硬係要我答嘅話：喺第一個情境，我唔會放棄同我一齊咗十年嘅另一半；但喺第二個情境，我有可能會轉而暗戀對方嘅孖生兄弟。而我估計應該大部份人嘅選擇都係同我一樣。
會噉樣揀嘅原因好簡單：同我一齊咗十年嘅另一半，佢可能客觀條件比唔上佢嘅孖生兄弟，但係我同佢相處咗十年，我哋之間有好多經歷同回憶。呢啲經歷同回憶令到我哋之間嘅感情昇華，我對佢嘅感情已經唔係隨便搵個客觀條件好過佢嘅人就可以取代到。
相反地，喺第二個情境，我同暗戀對象之間本身冇乜牽絆亦都冇乜共同經歷，我對佢嘅感覺，好大部份係建基於佢嘅外在客觀條件，既然係噉，當我遇到客觀條件同佢相近甚至更好嘅人，會變心都係人之常情。
另一半同語言
你可能覺得我拎另一半比喻語言係傻撚咗，但事實上兩者之間真係有好多相似之處。
我嘅母語係廣東話，我用咗呢個語言廿幾年，我鍾意廣東話句法靈活（例如主語省略、主語後置、名詞有時可以作狀容詞用）、多句末助詞（啦喇嗱吖啊aa4啫咋zaa4）、聲調高低抑揚好似唱歌噉。
上面嘅描述都係一啲客觀廣東話嘅外在條件，就好似我話我男友靚仔聰明噉。唔係話呢啲描述唔啱，而係有呢啲特質嘅人太多。我作為學過少少語言學嘅人，我好清楚廣東話有嘅特質，好多語言都有——台語有八個聲調、泰文、越南文都有句末助詞；甚至好多語言有嘅嘢，廣東話反而冇——廣東話冇濁音、冇輕聲、冇時態、冇case……
