哲學入門書包膠系列 （二）：來問問哲學家
哲學家唔係風水師，但依然可以喺街邊擺檔。
--
書名：
來問問哲學家：你沒想到的好問題，以及它們的答案作者：
伊恩．奧拉索夫（Ian Olasov）譯者：
朱家安涵蓋主題：
宇宙大哉問、日常問題、你冇諗過嘅問題優點：
措詞用語貼地易明
排版設計極靚
討論議題廣泛
思考脈絡清晰
中文翻譯極有心思缺點：
（未諗到）ISBN：
978–957–13–9187–8
如果你係個對哲學有興趣嘅門外漢，而你嘅預算淨係夠你買一本書，呢本書係我嘅首推，沒有之一。
根據經驗，最基本最入門嘅哲學普及書通常有兩種寫法。一種係（順序）介紹自古以來最出名最偉大嘅哲學思想——即係由蘇格拉底嘅「未經審視的生活不值得過」講到笛卡兒嘅「我思故我在」，又講下「說謊者悖論」同「無知之幕」，諸如此類。
（呢幾個概念都係我喺另一本未得閒寫讀後感嘅哲學入門書入面見到嘅，希望有朝一日會寫到佢……）
另一種就係好似今次講嘅呢本《來問問哲學家》噉，用「哲學問題」或者「思想實驗」做單位，去普及「哲學式思辨」。就我經驗，呢種方式通常會比第一種有趣少少，因為理論同主張喺呢度會擺喺一個較次要嘅位置，令大家可以更專注喺「思考」呢件事本身。
《來問問哲學家》呢本書背後有個好特別嘅設定：作者Ian Olasov（大學講師）聯同幾個同事同學生，自2016年起喺紐約街頭設立 “Ask a Philosopher”攤位，等路過嘅人可以即場同佢哋展開哲學對話。
關於攤位嘅setting，書入面有個幾幽默嘅軼事：
「來問問哲學家」每次擺攤，攤位上都會有三個碗，一個放滿哲學問題，一個放滿思想實驗，一個放滿糖果。在某個炎熱夏天的攤位上，糖果被拿光了。有個民眾看到空蕩蕩的糖果碗，問說：「這是關於哲學的什麼隱喻嗎？」讓我膝蓋中箭的感覺。
呢本書結集咗佢哋幾年間喺呢個攤位度收集到嘅有趣問題同答案，公諸同好。
點解我咁鍾意呢本書，喺度講佢嘅三個優點俾你聽：
世一意念
哲學普及唔係咩新鮮事，我最欣賞嘅哲普作家朱立安．巴吉尼（Julian Baggini）喺廿年前開始已經寫落唔少簡單清晰嘅哲普書。但係即使啲哲普作家已經寫得好深入淺出，佢哋始終都係學者。喺普及嘅時候少不免會用一種上而下嘅角度去選材、講解。
Ian Olasov當然都係學者，但係因為呢本書嘅背景設定本身就係「走上街頭嘅哲學攤位」，發問者來自唔同嘅出身背景，亦都屬於唔同年齡階層，於是除咗嗰啲好typical好「哲學」嘅哲學問題，呢本書亦都帶嚟咗好多令人眼前一亮嘅問題，好似係：
「起司焗雞胸肉是正宗做法嗎？」
「該殺死嬰兒希特勒嗎？」
「你最愛的動物是什麼？」
Ian Olasov喺書中提到，咩話題都可以同哲學拉上關係（當然有難易之分），作為一個哲學家，佢未必可以正面回答所有問題，但佢可以好輕易地提供另一個角度俾讀者反思。
例如書入面有一段關於「正宗」嘅討論係噉樣嘅：
美國大部分餐館，不管是中國餐廳，還是義大利或墨西哥餐廳，提供的食物某程度上都跟中國、義大利、墨西哥當地人真正吃的不太一樣。我發現這件事的時候滿失望的。不過這種失望合理嗎？首先，如果餐點很美味，正不正宗有差嗎？我們獲得經驗，並不…
