你樂觀啲你嘅生活就會好完美

繼續係冇乜營養嘅近況分享。

奇啲 Kei4di1
Oct 28, 2022

--

Screenshot from RAYVEL Studios: https://www.youtube.com/watch?v=bkPIP8rEc08

又一個月尾。

呢個十月都過得幾精彩,係幾年後回望返應該都仲會覺得精彩嗰種精彩。

分咗個手(正文第三行就寫啲噉嘅嘢會唔會太爆)。四年時間唔少唔多,啱啱夠修畢一個大學學位,我都正式喺呢段關係畢業喇。

其實唔知對方會唔會睇到,如果你睇到嘅話,想同你講聲唔好意思,呢次應該係我最後一次公開地提及你喇。我知你不嬲都對我公開分享關於你嘅嘢好顧忌,請原諒我太需要透過表達去建構自己。而你我嘅生命,的而且確,曾經緊密地交織纏繞喺一齊。我會盡我最大嘅努力梳理並提及只屬於我嗰部分,希望你包容埋我最後呢一次,多謝你。

搬走嗰個星期咁啱係reading week,其實諗返都覺得幾好彩,唔係嘅話我都唔知點樣可以喺一片狼藉嘅屋企(原生嗰個)上堂。

身邊嘅人知道咗,通常都會關心下我o唔ok(後來我會喺提起嘅時候講埋「其實我ok唔駛擔心我」)。幸或不幸,其實我真係唔得閒唔ok。

我依然每日跳繩(最近加咗每日舉啞鈴嘅環節),煮多咗飯,得閒落街散下步呼吸新鮮空氣,當然唔少得嘅係照常工作照常上堂。

最近喺公司同學校都認識到新知,而情感狀態嘅轉變都成為咗聯繫故友嘅契機,同大家相處間我見識咗好多,無論係factual嘢如有練背肌嘅人唔會駝背、點解錄完條片用耳機聽有聲但喺枱機播會冇聲,定係interpersonal skills、人與人溝通相處嘅技巧,我都有下意識噉觀察同學習。

即係呢……

衰啲講句,我真係好深刻感受到咩叫「Stars shine brightest when the night is darkest」。

Photo by Drift Shutterbug from Pexels: https://www.pexels.com/photo/scenic-view-of-mountain-during-evening-2085998/

原來我嘅世界可以咁大。

喺適應新嘅生活期間都總結咗少少諗法(就噉寫出嚟會勁似嗰啲心靈雞湯,但都真係喺我真實生活入面提煉出嚟的):

  • 糾正其他人錯失呢個舉動完全係吃力不討好,好多人會怕麻煩/避免衝突而忍氣吞氣,要好好感謝肯用時間指教你(尤其係就算唔教你,都唔會對自己造成咩影響)嗰啲人。
  • 覺得(現階段嘅)自己其實只係需要聆聽者,唔係真係咁需要咁重commitment嘅親密關係。
  • 我可以有而家咁舒適咁安逸嘅生活係托賴好多人嘅付出同犧牲,如果意識到嘅話,就盡量都用言語credit返對方嘅付出。
  • 所謂表達,除咗要「表」,更重要嘅係「達」,有時你單方面表述完,自以為講得好清晰,但其實可能對方根本接收唔到你嘅message,所以確認對方真係明、真係完完整整噉理解到你想表達嘅嘢其實好重要。
  • 好多同事知道我生活經歷嘅轉變之後都會驚嘆我份人真係好「樂觀」。其實我覺得呢個陳述唔太準確,我只係好理性地知道一蹶不振係無助事態嘅發展。減肥又好、人際關係又好、工作學業都好,盡人事知天命就已經問心無愧,杞人憂天好浪費時間。
  • 不過雖然我覺得樂觀呢個詞語唔太準確,但好似一般人眼中嘅樂觀就係咁上下嘅情況,噉我姑且接受自己係個樂觀嘅人啦,哈哈哈。

寫住咁多先,嚟緊仲有好多paper好多readings等緊我,下次見。

--

--

奇啲 Kei4di1

中文系畢業生,現職圖書館打雜。|Email: kei4di1@gmail.com