廿五前夕嘅人生巔峰

唔包括更新Medium方面 :o)

奇啲 Kei4di1

--

https://www.pexels.com/zh-tw/photo/1763808/

好耐冇見!!!!!!!

潛咗水個半月,個Medium雜草叢生,有少少感動嘅係呢段時間都零零星星有啲新subscribe嘅朋友仔,每個月有1000+ Views / 500+ Reads 左右嘅收視——連我自己都冇乜花心機打理個Medium嘅時候,都仲有人肯浪費時間睇我(一路累積落嚟嘅)鳩噏,小女子何德何能?實在不勝感激。

雖然呢個半月我喺Medium深潛咗,但我嘅現實生活就過得非常充實。我建立咗好多健康嘅習慣,每朝起身都好期待新嘅一日,全身散發滿滿嘅正能量,唔知嘅可能以為我轉咗行賣保險(XD)。

簡單總結下我呢個半月培養出嚟嘅新習慣:

• 每日跳繩1500下
• 每日做100至200下拉力帶深蹲
• 每個星期打一次壁球
• 行路上山返工
• 做嘢前晨讀20–30分鐘

運動組合(跳繩+深蹲+打波+行路)

睇返記錄,對上一篇文係6月21號寫嘅,嗰日咁啱係我開展咗每日跳繩習慣嘅第二日。

其實我一開始只係每個星期打一次壁球,打到逐漸形成習慣之後,我開始為自己添置一啲運動用嘅衣着。但係有一日我行入Uniquo,隨手拎咗件背心去更衣室試,然後望住鏡入面嘅自己。

What lun the FUCKKKKK?!?! 呢個肥到仆街嘅女人係我嚟?!?!?!?!

我望住嗰對粗過燈柱嘅手臂,內心崩潰到缺堤,於是我二話不說放低咗件背心,離開咗間Uniquo,然後行咗入隔籬間迪卡儂買咗條繩嚟跳。

一開始嘅目標係每日1000下,後來見跳完1000下都唔算好攰,就加多咗500下。到目前為止,我覺得跳完1500下體力都消耗得八八九九,暫時應該唔會再加上去。

由6月20號到(落筆呢一刻嘅)尋日為止,我開展咗跳繩呢個習慣52日,喺呢52日入面有46日我都有跳到繩,中間冇跳到嗰啲日子,通常係因為天氣唔許可,又或者係我有朋友聚會,於是暫停一日。

其實我都冇諗過自己可以持續到每日做運動嘅習慣——由細到大我都係嗰啲運動神經極差嘅人,PE由小學到大學都係C range,同朋友跑海濱會跑到嘔(十年前),但我覺得跳繩俾我嘅感覺好唔同,可能因為跳繩個單位可以被切割得好細——跳一下都係0.5–1秒嘅事,唔爭在跳多下,再跳多10下,再跳多100下,可以見唔對路就停、隨時中止。於是相比起其他運動,我唔需要做一輪心理建設先開始跳繩(例如我打壁球嘅單位係30分鐘起跳,又或者跑步嘅話會希望至少跑到一個圈噉樣),令我好樂意每日都抽少少空檔出嚟郁動下。

好多人聽到我每日咁努力抽時間、搵地方跳繩,都會隨口講一句:

「你真係好鍾意跳繩。」

通常我聽到呢句都不置可否、含混帶過就算。因為我內心諗嘅係:

其實我鍾意嘅唔係跳繩,而係每日都堅持跳繩嘅自己。

講出口太矯情,喺度寫咗當講咗。

深蹲同樣係單位可以被切割得好細嘅運動——反正我每晚都會開電腦睇YouTube,噉點解唔一邊做深蹲一邊睇?

同埋唔知點解加咗條拉力帶做深蹲會開心過冇加,可能呢啲就係所謂嘅儀式感作祟?

同跳繩一樣,一開始係每日一百下,後來覺得好似做多一百下都OK,而家就通常每日二百下。

打壁球方面就冇乜特別,我Year 1上PE堂學完之後間中都有打下,而家純粹係令到成件事更恆常啲,畢竟公司有資源喺度,我又難得好享受打波嘅過程(享受過跳繩好多!),就梗係唔好嘥。

至於點解係每個星期打一次波但就每日都跳繩……因為book壁球場要錢,跳繩唔駛錢——嗚,好窮。

行路返工方面,我之前一直都係搭staff shuttle返工,每日固定時間出門口,office hour前十分鐘到公司噉。

不過唔知係咪因為我做多咗運動,某日開始我發現我早過平日半個鐘起身都唔覺眼瞓。見時間相當充裕,我就開始嘗試搭公共交通工具返工,然後行路上山,當增加運動量。

(至於本身每朝返到公司先飲嘅齋啡,就變咗喺屋企飲埋先出門口,等我行路時可以消耗更多熱量。)

晨讀

--

--