以前返過嘅Bullshit工

人生冇意義事十常八九。

大學畢業之後，我好快搵到第一份工。係份外判合約嚟，喺間大型保險公司做customer service。

呢間保險公司有做個人保險（人壽、危疾、醫療），亦都有做僱員福利（醫療、強積金），規模太大分咗好多條唔同嘅team，而我一開始係喺僱員醫療條team聽hotline電話。

聽電話並唔算係一份bullshit工，始終客人的確有問題需要我哋幫佢解決。但係並唔係每位客人都係抱住「解決問題」嘅出發點打電話，而我作為一個newbie亦都有太多嘢唔識答、唔識處理。種種嘅唔適應令到我工作壓力好大，喺某個工作日，我凌晨五點鐘就砸醒咗瞓唔返，嗰下我就知道我需要離開。

我去咗搵經理辭職。唔知係好彩定唔好彩，佢哋都好想留低我，於是就幫我諗下辭職以外嘅選擇。佢哋知道咗我讀中文系，就問我有冇興趣轉去letter team幫手覆書面信件。我答咗可以，然後受寵若驚地等待轉team。

然而事情冇咁順利，因為當時嘅letter team係另一個manager嘅管轄範圍，而嗰個manager亦都遞咗信準備last day。於是我本身嗰條team個manager又走嚟問我：

「web chat你有冇興趣啊？我哋有條web chat team係負責答客人online message，打字就得㗎喇唔駛聽電話。

不過暫時都未有太多chat，佢哋冇嘢做嗰陣就幫手jot下message，即係留低客人電話遲啲覆返佢哋，唔駛答佢哋問題。你ok嘅話噉就我哋自己team可以解決，唔駛notify letter team。」

我懵下懵下答咗好，呢個就係bullshit工嘅開始。

不得不說呢啲管理層真係好識得將啲垃圾duty堂而皇之噉present出嚟。所謂嘅「jot message」，其實即係見到個call廿秒內都冇人聽嘅話就拎起個電話同對面講：

「唔好意思，客戶熱線而家線路繁忙，呢度係總機，麻煩留低聯絡電話，我哋會儘快打返俾你。」

唔係錄音嚟，係真人發聲㗎！係咪巧威威？

至於點解要安排幾個人（冇錯，唔係一個人，係幾個人）坐喺度淨係講句噉嘅嘢，背後亦都有啲好撚柒閪無謂嘅原因。

因為管理層set咗個目標：打過嚟嘅電話廿秒之內一定要有人聽。

但係佢哋請唔撚夠人幫手聽電話，就只可以搵幾個人幫手處理曬嗰啲廿秒內未有人聽嘅電話，噉樣出嚟條數就可以靚靚仔仔，粉飾太平。