碩士半工讀兩年嘅碎碎念

呢兩年大家都辛苦喇。

搵到張present中嘅相覺得幾好，希望唔會被起底⋯⋯

（點擊此處閱讀全文）

唔知算唔算好耐冇見。啱啱返去check check記錄，master在學期間我都寫過六篇文，間中會趁sem break上個水噉，應該都算係我有認真生活嘅憑證。

都多謝喺呢段時間有得閒嚟我Medium睇下我死得未嘅朋友仔們，你哋嘅關注資助咗我50蚊左右嘅學費（港紙）！

Anyway，首先想同過去兩年嘅奇啲講聲：

I am so proud of you!!!!!!!!!

交咗十幾皮學費，耗費咗兩年光陰，想寫篇文好好悼念下我嘅半工讀經歷，都當係同關心我嘅朋友分享下我嘅體會噉啦。應該只此一篇，寫多篇我都嫌自己剎有介事：

我竟然未死

重中之重一定要講嘅！我覺得自己可以捱過呢兩年真係一個創舉。有好多個放學返屋企嘅夜晚我都喺度諗「我聽朝會唔會暴斃」。

我試過喺一個星期內返咗五日工、交咗兩份功課、做咗兩個present、去咗一個job interview。

我都試過喺一個月內返廿日工，同時有十五晚要上堂。

雖然我由入學到畢業都完全唔覺得taught master係啲咩學術成就，充其量證明到自己有一定嘅財力去負擔學費，但係功課再hea都係要交、堂再悶都係要上，呢個master就算唔係啲咩能力上嘅認可，都算得上係我堅持過嘅憑證。

遲讀不如早讀

上面講完半工讀有隨時暴斃嘅風險，正好帶到嚟跟住落嚟呢點。

個人體會係，如果讀master喺你嘅生涯規劃入面係一件點都會完成嘅事，我會強烈建議盡早讀。

原因有三：

1. 學費真係加得好甘：以我讀嗰科為例，我兩年前入學，成個programme學費係大概17萬，而家你想讀返同一個programme，學費盛惠22萬，兩年嚟加咗五萬。
2. 體力會隨住年紀增長而變差：咁燃燒生命嘅嘢都係趁後生做比較好，起碼復原能力比較好。
3. 年紀越大會越嚟越忙：我假設有讀碩士計劃嘅朋友仔，大家嘅人生規劃應該會相對符合社會期待啦。噉suppose去到一定年紀，大家會開始建立家庭，或者喺事業上有所晉升，如果去到呢個時候先再嚟半工讀，一係會chur到分身乏術，一係就需要將個學位拖長嚟讀（我有個同學，佢同太太兩個都讀緊書，屋企仲要有兩個小朋友，真心佩服）。