失蹤人口奇啲近況

時間管理|事業同學業|運動同飲食

奇啲 Kei4di1

--

又一個月,生活隨住開sem變得忙碌,萬幸暫時仍然平衡到所有自己珍視嘅事物,都係件幾值得沾沾嘅事嚟。

時間分配嘅大原則

愛就係選擇。選擇就係捨棄。

因為重視嘅嘢有啲多,所以要喺相對冇咁重視嘅地方度拎時間。

例如我喺做咗運動之後就玩少咗好多電話、開始晨讀之後就瞓少咗覺。最近因為要將夜晚分俾lecture、打壁球同mealprep,於是就連睇YouTube嘅時間都割捨咗好多。

如果有人同你講:

其實我都想XXX㗎,不過我真係抽唔到時間出嚟啊。

其實佢嘅意思即係:

雖然我都想XXX,不過我覺得YYY同ZZZ嘅優先次序喺XXX之上,XXX對我嚟講都唔算太重要,所以都係算啦。

只要夠重視,就會有時間。

事業同學業

話說喺我25歲生日正日,我收到我人生第一份appraisal report。

可能因為本身太有自信,個分數比想像中低咗少少,不過慶幸依然係自己預期中嘅ranking。

不知不覺而家呢份工都做咗年半,啲工作流程都開始駕輕就熟,同同事嘅關係亦都好和諧融洽,除咗人工低咗啲之外,其實都真係冇乜得挑剔。

而呢個舒適嘅環境亦都好適合我而家part-time讀書,所以如無意外我應該都會喺同一個地方留多兩年,直到畢業為止。

關於學業,so far上咗兩個星期,暫時最大嘅感受係「真係好吹水」。

今個sem讀兩科,其中一科我比較有興趣,於是上堂都比較有信心答問題,結果雖然我答出嚟嘅嘢經常都同instructor想講嘅嘢唔同,但因為我係少數肯應佢機嘅學生,所以感覺佢都幾喜歡我(噉我又真係幾得人喜歡嘅,好似係)。

我曾經都係嗰啲好唔願意表達、好驚答錯會柒親同學嘅學生,但係而家大個咗少少,反而想好好把握可以回應嘅機會,就算我答得離題萬丈,噉至少我會對「正確嘅方向」更加有記憶。

當然亦都有功利嘅考量啦,上堂時表現得積極啲,老師對自己印象好啲,喺將來嘅某一日可能會派上用場。

退多一百萬步,就算我真係對正確答案冇印象,老師都對我冇印象,我咪當用上堂時間練英文speaking囉。

點計都係我有賺。

講到呢度,都不得不感謝我有一份相對工作量唔大嘅正職,可以財政上支持我讀書之餘,亦都俾到充足嘅時間我備課,我先可以咁有自信地不停上堂鳩噏,嘻嘻。

運動同飲食

--

--