講下食辣

廢文廢出新境界。

呢篇文係我今日食食下爆辣冷麵時忽發奇想嘅一啲思緒，冇乜資訊可言，純粹覺得自己食咗咁多年辣，又幾乎日日都要食辣，關於呢個topic應該都有啲幾多嘢可以講。

（啊Anthony Li寫佢食煙都寫咗好鬼多字，噉我食辣應該都上上哋癮，咪照辦煮碗寫兩句囉）

食到幾辣？

我覺得譚仔嘅米線只係非常一般。對我嚟講，譚仔其中一個最偉大嘅地方，在於佢提供咗一個好具像化嘅食辣指標俾香港人去比較大家各自「食到幾辣」。

喺譚仔未紅之前，大家食辣嘅指標可能係「完全唔食辣」、「食到少少辣」同埋「好食得辣」就算。但係彼此之間嘅標準可以有好大落差，例如「聲稱好食得辣嘅人」可能仲冇「聲稱淨係食到少少辣嘅人」咁食得辣，去到大家聚餐食麻辣火鍋時就中曬伏。

然後大家會開始搵一啲標準化而且係量產嘅產品去進一步說明自己食到幾辣，例如係熱浪薯片啊、脆弱雞腿包啊之類。但係喺香港呢個唔係全民食辣嘅地方，通常量產得嘅產品都只係微微咁辣，令到食得辣嘅人冇辦法用呢個方法去說明俾大家聽「我到底有幾食得辣」。

譚仔嘅出現正正解決咗呢個問題。喺今時今日，大家或多或少都會食過一餐半餐譚仔，而正正係因為譚仔（三哥）啲分店多到好似麥當勞噉，譚仔嘅辣度亦都成為咗香港人其中一個最常用嘅食辣度量衡。

講咗咁耐，好似都未申報小妹到底食到幾辣——我巔峰時期可以食到大辣，不過後來發現食完會胃痛，我又未鍾意食辣鍾意到要噉樣折磨自己，而家通常嗌個小辣過下口癮就算。而成日掛喺我口／手邊嘅男友就連十小辣都食得好痛苦，我哋喺食辣上嘅不一致性都為我哋帶來咗一啲挑戰（XD）。

譚仔我最鍾意泡淑酸菜魚湯底，得冇三哥嗰間先有嗚。

食辣嘅社交

鍾意食辣嘅我有個唔鍾意食辣嘅同居男友，呢個設定俾咗好多機會我哋彰顯對對方嘅愛（笑）。

首先係簡單嘅「晏晝／夜晚食咩好」 ——米線類佢一個月最最最多肯陪我食一次（仲要嗌清湯），但我又好鍾意食米線喎，噉就一係分開買外賣返屋企，一係就我食自己時先去食。

然後有打邊爐嘅考慮——通常都係我就佢嗌唔辣湯底，再自己調配辣豉油蘸。之但係麻辣湯底同辣調味料個性質其實爭好遠咖嘛，不過都冇辦法，真係想食麻辣湯底嘅話，一係嗌鴛鴦鍋，一係就搵啲食辣朋友自私食，噉我通常會揀後者。