Member-only story
由細到大，我都好驚答一個問題：
你有咩興趣㗎？
驚答呢個問題，有兩個原因：
一、自卑感作祟
好記得啱啱升上中學嗰陣，每堂嘅最開始，老師都不免俗會叫我哋自我介紹，都係講下自己中英文名、有咩興趣噉。然後喺嗰個一人一樂器（which我學親都係半途而廢）嘅年代，大家嘅興趣永遠都係「彈琴」、「吹長笛」、「拉小中大提琴」（嗰個年紀又未興彈結他），之類之類之類。
然後輪到我：
Er，我嘅興趣係睇書同瞓覺。
唔知點解呢，我成日都覺得啲人問「你有咩興趣」，其實唔係真係問緊你「你鍾意做啲咩」，而係問緊「你識做啲咩」。
呢個都係我諗點解「班入面三十八個同學有二十個都話自己鍾意彈琴，但turn out有十八個喺考完八級之後就賣咗部琴」嘅原因。
而每次當我答「我嘅興趣係睇書」，就好似暗示緊俾對方知「我唔識玩任何樂器、亦都唔識玩任何運動」噉。
至於你係咪真係鍾意睇書，who cares?
二、不切實際嘅預期
承上，一樣地唔知點解，講得出係「興趣」嘅「技能」，好似都要有返一定程度先至有資格成為「興趣」。即係例如我同你講「我嘅興趣係畫畫，不過我淨係識畫火柴人」。
唔係話唔得嘅，但，好似好唔convincing噉囉。
可能因為風氣使然，「睇書」呢個「興趣」喺我讀大學之後開始「正當化」（或者話「小眾化」？唔知，我又唔覺得有幾小眾）。
但係呢種「正當化」好似又衍生咗另外一啲問題。
當我答一個新認識嘅人「我嘅興趣係睇書」，加上我嘅學系背景，有啲人就會開始問「你係咪好鍾意張愛玲／魯迅㗎？」「你係咪細細個就睇曬中國四大名著喇？」「你有咩鍾意嘅作家啊？」
然後如果我答：「唔係，呢啲我全部都唔睇。」「我冇咩特別鍾意嘅作家喎，我見到一本書覺得啱睇就會拎嚟睇。」大家又會覺得好奇怪：「你唔係鍾意睇書㗎咩？」
與此同時，我大學有個同學仔，佢係真係超級非常極度鍾意睇書嘅，係去到「佢每次上堂之前就係坐喺個位度眾精會神地睇書，而佢每次睇嘅書都係唔同嘅」嗰種程度。
