Freshgrad返外判合約工嗰年

回眸一笑，是如此可笑。

之前講過，返第一份full-time嗰陣，我試過做一啲好bullshit嘅工作內容：

以前返過嘅Bullshit工

雖然好快我就離開咗嗰個bullshit工作崗位，調咗去一條相對比較適合自己嘅team，工作內容亦都發揮到自己一啲長處（即係寫嘢），但最後我都係離開咗嗰間公司，甚至離開咗嗰個行業。並唔係因為工作內容有咩突變，亦都唔係有咩人事問題，離開嘅原因只係因為嗰份係一份外判合約工，而我遲遲等唔到轉正嘅一日。

所謂外判合約（secondment contract），喺金融業同政府比較常見，簡單嚟講就係你受聘於A公司（Agency）去幫C公司（Client）做嘢。你每日喺C公司返工，由C公司嘅管理層指派工作，但係C公司係唔會出糧俾你，而係每個月俾錢A公司，再由A公司負責出糧俾你。

點解要噉樣請人呢？我都唔係太清楚，不過應該都不外乎係為咗節省成本、維持用人嘅彈性之類掛。

我可以噉樣入咗間公司短短三個月就由呢條team轉去嗰條team再轉去另一條team，某程度上都要多謝外判合約嘅彈性。如果當初我係直接受聘於C公司，應該都冇乜可能咁輕易做到（我估）。

外判合約同直屬員工有咩分別呢？就我當年嘅經驗，客觀嚟講，就係所有由C公司HR負責處理嘅員工福利全．部．都．冇．你．份。偏偏C公司嘅福利都算係相當唔錯——有免費零食嘅員工休息區、迪士尼飛、閒日早收半日去sports day嘉年華會、醫療卡、ESPP（員工認股計劃），全部我都係得個望字，仲有最現實嘅人工年假少人一截、工作時間多人半個鐘……

老實講，雖然我一開始唔知C公司嘅福利係好成噉，但我對呢啲差別待遇都唔係完全冇心理準備——當年嘅我仲係一張白紙，文科出身、英文唔好、仲要冇返過任何intern。啱啱入去嗰陣，都係抱住一個「人哋肯請自己已經好好，雖然唔係親生仔，但可以喺大公司學嘢都唔錯吖」嘅心態入去做，加上其實嗰度嘅同事都好nice，佢哋唔會歧視我呢啲外判員工，反而仲好樂意帶我入員工休息區拎嘢食、將公司送嘅嘢轉送俾我，所以其實我大部份時間都係返得幾開心。

好記得有一次，C公司預備咗啲好無謂嘅禮物（證件套）送俾員工，嗰陣我條team個新經理啱啱入職，佢行過嚟我哋個位附近，一隻手拎住一個證件套，然後分別遞咗俾我同隔籬個senior同事A。