中文書信格式常見（低能）錯誤（一）
嗰啲話讀中文冇撚用嘅人，千祈唔好俾我捉到你寫信錯格式 ^^
Dec 23, 2019
講明先：呢篇文嘅智商門檻係0，我淨係會講最最最簡單嘅格式，想搵咩君安學安編安台安教安台鍳大鍳嗰啲可以上一頁離開。
另外小標題寫嗰啲係錯誤嚟，唔好誤認咗係指引thanks：
前稱式加「此致」
「一開波就響收件人個朵」嗰啲信叫「前稱式」，前面已經稱呼咗條友嘅話，結尾就唔駛再寫多次㗎喇，寫句祝頌語hea下佢，之後撻返自己個朵就ok了：
阿俊：
俊？邊撚度俊啊？睇過？
祝 身體健康！
廿八座大王上
(日期)
後稱式唔加「此致」
如果唔想一嚟就響朵，可以用後稱式。之但係冇咩特別（例如學校考試逼你用）我都唔建議你寫信用後稱式，因為根據非正式統計用得後稱式嘅人99.99%都係用到錯曬。「後稱式」嘅標誌係「敬啟者」，之但係避得一時唔避得一世，對方個朵最後都係要出，所以先要加「此致」（直譯：「呢封信係寫俾」），好似咁樣：
敬啟者：
俊？邊撚度俊啊？睇過？
此致
阿俊
廿八座大王上
(日期)
「此致」之後寫自己名
講多次：後稱式「此致xxx」嘅意思係「呢封信係寫俾xxx」，但係大家經常會以為寫完「此致」就可以落署名然後898（又或者係調返轉嚟諗寫署名前要寫「此致」），唔係啊大佬！「此致」同署名係咩關係都冇㗎！！！有時收到啲信係此致之後係落個寄件人自己署名，真係會唔想覆，反正個收件人都唔係我。
寫完信唔簽名
寫完信，記得簽名，寫信俾銀行/證券公司/保險公司嗰啲記得簽返你登記時個簽名。對唔到簽名=驗證唔到身份=覆唔到你。唔係我哋想拖，而係我哋真係無能為力。
雖然篇文叫（一），但唔希望有（二）。
